O sábado, 19 de decembro, ás 17:30 horas, o Pavillón Municipal de Deportes de Lugo será o escenario para o estreo do CV Arenal Emevé na segunda volta da Liga Iberdrola de voleibol. Será contra o OSACC Haro Rioja Voley, un equipo que ven dunha racha de catro vitorias consecutivas.
As lucenses tiveron un parón obrigado na xornada anterior ao non poder enfrontarse ao Sanaya Libbys La Laguna ao detectar un positivo no club canario. Este tempo inesperado de descanso pode dar forzas ás loitadoras, que levan tres partidos sen gañar.
O Emevé leva un mes sen triunfos
A última vitoria foi hai cousa dun mes, ante o FC Cartagena – Algar Surmenor. Desde entón, o equipo dirixido por José Valle non foi quen de vencer ás súas rivais e o Arenal Emevé ocupa a antepenúltima posición.
Case vinte puntos por riba, e cun partido máis, están as rioxanas, ocupando a quinta posición. O Haro Rioja chega á pista do Emevé dun encontro moi igualado contra o CV Kiele, no que foi necesario un tie break para decidir o encontro a favor das de Alberto Avellaneda.
Para evitar que o seu repertorio de triunfos siga aumentando, as lucenses deben ser superiores en ataque, confiando no xogo de Lucía Prol e Inma Lavado e tamén en defensa, freando no outro lado da rede a Rocío Gómez, Alicia de Blas ou Tatiana Vera.
A fin de semana sen xogar debeu servir para corrixir os erros que se repiten nos partidos e que en encontros anteriores, como contra o IBSA CV CCO 7 Palmas decidiron o partido.
Esta será unha nova oportunidade para que as loitadoras sumen puntos en casa e intenten alonxarse da parte inferior da táboa.
