Esta décimo sétima xornada da Liga Ibedrola de Voleibol da RFEVB supón unha gran oportunidade para o CV Arenal Emevé para alonxarse da parte baixa da táboa. Reciben en Lugo ao Madrid Chamberí, penúltimo clasificado, nun duelo que as enfronta este sábado, 30 de xaneiro, ás 17:30 horas.
As loitadoras non poderán acusar o cansancio de xogar entre semana. O mércores fixeron un gran partido ante un dos máis grandes equipos da categoría, o CV Kiele, que tivo que vencer no tie break. Este sábado, o rival é de menor nivel, máis próximo en resultados ás lucenses, polo que non está permitido fallar.
O Madrid Chamberí suma seis puntos en doce partidos xogados, nos que só logrou puntuar en dúas ocasións. No último encontro que disputaron, as madrileñas caeron por un 0-3 contra o CV Kiele. Ademais, este será unha fin de semana intensa para as visitantes, xa que o domingo xogarán contra o CV Sant Cugat.
Con catro partidos xogados máis, as lucenses superan en cinco puntos ás madrileñas, pero todas están desde hai varias xornadas na cola da clasificación. As loitadoras ocupan a décima posición con 11 puntos, mentres que o Madrid Chamberí ocupa a undécima con 6 puntos.
O Emevé debe enmendar os erros da ida
Estes dous conxuntos enfrontáronse xa na cuarta xornada na pista das madrileñas, cun resultado nada favorable para as lucenses. Neste partido, o Madrid Chamberí logrou gañar cun 3-1, ao non perdoar en ningún set agás o segundo.
Entón, como sucedeu nos seguintes partidos, un dos hándicaps que teñen que superar as galegas é o de deixar de ceder puntos ao rival por erros propios. No último duelo, contra o Kiele, as lucenses concedéronlle 35 puntos ás contrincantes, o que determinou o desenlace do partido.
No lado que desta volta será visitante, destacaron na primeira volta Paula Carpintero, Inés Villa, Alejandra Olalla e Iva Pejkovic, que levaron ao seu club á vitoria. Pero o Emevé non se queda atrás.
Lucía Prol, a baza do Emevé
Lucía Prol está a ser unha das estrelas do Arenal Emevé. Grazas a súa boa actuación e acerto a fin de semana pasada, contra o Cajasol Voley Dos Hermanas, foi proclamada a mellor xogadora da xornada.
A loitadora número 15 estivo no Sete Ideal, do que tamén formaron parte as súas compañeiras Sara Urrea e Inma Lavado.
