Con cero puntos e seis partidos xogados chegaba o CV Arenal Emevé á sétima xornada de Liga Iberdrola. Custou arrincar, pero desde aquela primeira vitoria contra o Avarca Menorca comezou unha boa racha para as lucenses que se mantivo o pasado sábado. Tras vencer ao FC Cartagena Algar Surmenor, cunha moi boa actuación de Carolina Camino, MVP da xornada, as de José Valle acumulan xa cinco puntos que as alonxan da parte inferior da táboa.
Antes do encontro, ambos os dous equipos chegaban á cita deportiva coa intención de abandonar os últimos postos da clasificación. O Cartagena estaba daquela na décima posición, cun total de 15 sets en contra e so 7 a favor, mentres que o Arenal Emevé ocupaba o undécimo posto, con 18 sets en contra e 5 a favor. Sobre o papel, prevíase un partido moi igualado, e así foi. Foron necesarios cinco sets para decidir o encontro, pero finalmente as xogadoras lucenses impuxéronse no luminoso.
O partido comezou cun pulso entre as murcianas e as loitadoras. As locales confiaban nos erros do adversario, que lle permitiron sumar oito puntos no primeiro set, mentres que as lucenses adiantábanse no marcador grazas ao seu bo ataque. O encontro decantábase cunha lixeira vantaxe para o Emevé, chegando a un tanteo do 24-26 no primeiro período.
Para o segundo set, o Cartagena reaccionou e adiantouse marcando 13 puntos por ataques e 9 por erros das visitantes. O CV Arenal Emevé quedábase atrás e este segundo periódo foi finalmente para as murcianas, cun marcador final de 25-18.
As loitadoras non se renderon, e asinaron un moi bo terceiro set que enchufounas de novo no encontro. Con 4 puntos directos e a precisión en ataque de Carolina Camino, o CV Arenal Emevé levouse o terceiro set por un 17-25.
O partido estaba tan igualado que foron necesarios dous sets máis para determinar quen merecía o triunfo no enfrontamento. O primeiro set gañouno por dous puntos o conxunto do Cartagena, mentres que o último levouno por outros dous o CV Emevé. Finalmente, o resultado global foi de 2-3 e os dous puntos marcharon rumbo a terras de Lugo.
Camino, do Emevé, MVP da oitava xornada da Liga Iberdrola
Destacou no encontro a actuación da receptora do Emevé, Carolina Camino. A xogadora galega foi a máxima anotadora da oitava xornada e a segunda mellor atacante grazas aos seus 33 puntos, 3 blogueos e 2 saques. Moi salientable foi o terceiro set, cando Camino asinou 13 dos 25 puntos do conxunto lucense. Estas estatísticas a fixeron MVP da oitava xornada na Liga Iberdrola de voleibol.
La receptora de @cvemevelugo Carolina Camino es la MVP Iberdrola de la octava jornada de #LigaIberdrolaVB https://t.co/Sm2CTWsnlj pic.twitter.com/sOnILypAey
— RFEVB (@RFEVB) November 16, 2020
FICHA TÉCNICA
FC CARTAGENAR ALGAR SURMENOR: Carmen Barón, Isabel Barón, Elena García, Fernanda Gritzbach, Elena García Conrado, Miriam López, Encarnación García, Alejandra Cegarra, Paula García, María Arnau e Adriana Durán.
CV ARENAL EMEVÉ: Carolina Camino, Julia Paradela, Audrey Alford, Inmaculada Lavado, María Rodríguez, Sara Urrea, Carla Jiménez, Lucía Prol, Inés Rivas, Ainara Burgo, Marta Otero e Cassandra Leann Bujan.
SETS: 24-26 / 25-18 / 17-25 / 25-23 / 17/29 (2-3).
ÁRBITROS: Richard Martínez e José Luis Arrarte
INCIDENCIAS: Partido correspondente á oitava xornada da Liga Iberdrola de voleibol no pavillón Escolar El Algar Algar.
