O CV Arenal Emevé e o CV Calasancias proclamáronse campión e subcampión respectivamente no Campionato Galego Infantil de voleibol, celebrado na cidade da Coruña. Segundo esta clasificación, lucenses e coruñesas representarán a Galicia no torneo estatal. No autonómico tamén competiron o Aceites Abril CVO, terceiro clasificado, e o Korbis de Monforte, cuarto.
A Federación Galega de Voleibol estableceu a cidade herculina como sede da loita polo título galego, entre os catro mellores equipos da liga regular, e co CV Calasancias actuando como club anfitrión.
O CV Calasancias abriu a fase final
O primeiro partido celebrouse ás 10:00 horas no pavillón municipal do Barrio das Flores, a pista do CV Calasancias, na que as propias coruñesas estrearon o campionato ante as ourensás do Aceites Abril. Neste duelo o vencedor pasaría directamente á final. Ao longo do partido, as xogadoras do Aceites Abril non eran quen de defender o gran saque das herculinas, que venceron por un pleno de sets (3-0).
O seguinte encontro comezou ás 12:00 horas, enfrontando a CV Emevé, o favorito, e ao Korbis. O duelo tivo claro dominio lucense e o resultado refrexou a súa superioridade cun 3-0 final.
Pola tarde disputouse o partido para decidir o terceiro e o cuarto clasificado, entre o Aceites Abril e o Korbis. A igualdade reinou na pista coruñesa, entre dous equipos de similar nivel. Porén, as ourensás lograron impoñerse e levarse grazas á súa regularidade todos os sets, rematando o duelo cun 3-0 que lles deu a medalla de bronce do campionato.
Na final, o Emevé volveu demostrar que era o equipo mellor preparado, e proclamouse campión autonómico vencendo contundentemente ás coruñesas do Calasancias por un 3-0. O cadro local non tivo oportunidades ante as todopoderosas xogadoras de Lugo, que controlaron con tranquilidade o partido.
