A quinta xornada da Liga Iberdrola non rematou do mellor dos xeitos para o Arenal Emevé, que visitaba ao CVB Barcelona nun duelo directo na loita polo liderado. As lucenses caeron no tie break e volveron a Galicia cun punto no peto que as mantén a dous da cabeza da táboa.
A fin de semana tivo un sabor moito máis doce para o Autos Cancela Zalaeta. Logo de dúas xornadas quedando ás portas da primeira vitoria nesta nova tempada da Superliga Femenina 2 (SF2), o equipo coruñés conseguiu o triunfo ante un Madrid Chamberí que chegaba como líder.
Fin á racha de vitorias
A derrota no feudo do Barça supón un pequeno tropezón para as rapazas do Emevé, que acumulaba tres vitorias seguidas logo dun inicio ligueiro que comezaba cunha derrota in extremis ante o Avarca de Menorca.
Foi precisamente deste xeito como certificou a súa segunda derrota o cadro que adestra José Valle. E iso que o encontro pintaba ben. O trío de ataque cimentado por Carolina Camino, Darlevis Mosquera e Jimena Fernández conseguiu situar ao Emevé cunha vantaxe de dous a un (22-25 / 25-14 / 15-25).
Porén, o tie break foi claramente para as catalás, que pecharon o partido cun 15-11. A pesar da derrota, o punto logrado en Barcelona sitúa ao Arenal Emevé con dez puntos na táboa clasificatoria, quinto empatado co propio Barça e a dous puntos da cabeza que conforman o DSV CV San Cugat, o CV Kiele Socuéllamos e o CV Gran Canaria Urbaser. Este último será o rival das lucenses na vindeira xornada, que se disputará previsiblemente o 11 de novembro no Centro Insular de Deportes.
Premio merecido para o Zalaeta
Non se pode dicir que o Zalaeta non loitou pola vitoria no que vai de tempada de SF2. Tres partidos, tres tie breaks. Despois de dous desenlaces agridoces, as coruñesas lograron vencer o pasado sábado ante nada máis e nada menos que o Madrid Chamberí, que chegaba ao Barrio das Flores como líder e sen perder nin un só set.
Foi un partido de contrastes. Tardou en carburar o equipo que destra o técnico Jorge Barrero, que caía no primeiro tempo por 18 a 25. A resposta do cadro coruñés foi un contundente 25 a 15 na reanudación, que non evitou un estrepitoso 12 a 25 no terceiro período. Cun parcial desfavorable, o Zalaeta loitou e conseguiu rescatar un 25 a 23 moi axustado para levar o partido ata o desempate. Un máis. Mesmo final?
👋🏻 Comezamos a semana ca celebración da primeira vitoria da tempada do @CVZalaeta , despois dun traballado partido ante un gran rival!
💪🏼 Parabéns equipo, a por outra!
(📹: @coruna_deportes ) pic.twitter.com/OBaLiAa4IL— FGVB (@VoleiGalego) November 1, 2021
Non. O Autos Cancela Zalaeta rubricou cun 15 a 12 a súa primeira vitoria nesta edición da SF2. Dous puntos que se suman aos outros dous cos que xa contaban e que as afastan lixeiramente dos postos perigosos da clasificación. Sétimo e con tres partidos (un menos que as rivais), o cadro coruñés visitará Madrid o domingo 7 de novembro para medirse ante o Sanse Live Vuvuzela, que se sitúa noveno con tres puntos.
