Outra vez máis non puido ser. O CV Arenal Emevé recibía en casa a un dos mellores conxuntos da Liga Iberdrola, o IBSA CV CCO 7 Palmas, que foi superior e levouse os tres puntos da undécima xornada cun 0-3.
Volvía o voleibol de competición ao Pavillón dos Deportes de Lugo, pero non o fixo así a vitoria. O Arenal Emevé loitou ata o final por rascar puntos, pero o conxunto visitante foi superior e pecha a primeira volta na terceira posición.
O Emevé presionou ata o final
Desde o comezo do encontro, o cadro local deixaba claro que non ía poñerlle as cousas fáciles ás canarias. A diferenza na pista parecía menor que o que mostra a clasificación, onde ambos equipos lévanse vinte puntos.
O Emevé loitaba cada balón coma se fose o último e devolvía os tantos do IBSA sen baixar os brazos. Os dous equipos brilaban no saque e na recepción, xerando ocasións para ambos equipos.
Tras lograr un parcial para as locais de 3-0, que deixaba un 17-14 no electrónico, o adestrador visitante, Pascual Saurín, pediu un tempo morto. Este serviu para que as visitantes axustaran a súa recepción e comezaran a frear o xogo do Emevé, logrando o empate 20-20.
O primeiro set acabou por decidirse nos últimos minutos, cando as canarias leváronse o punto por unha lixeirísima diferenza de 23-25.
Para o arranque do segundo tempo o cadro do Emevé foi, de novo, superior nos primeiros minutos, logrando unha vantaxe de cinco puntos que facían crer na remontada.
Outra vez foi necesario un tempo morto para que as visitantes reaccionanse. E así o fixeron. Tras recibir instruccións do seu técnico, as xogadoras do IBSA lograron tres puntos seguidos grazas á actuación de Lucía Varela.
Isto obrigou a José Valle a pedir outro tempo morto, cun 10-8 no marcador. O marcador seguía sendo testemuña do vaivén de puntos, nun set que parecía non ter dono. O partido rompeuse a partir do 18º punto, cando as visitantes desmarcáronse e leváronse o segundo set.
Para o tempo final, os esforzos das loitadoras por adiantarse no marcador diluíronse a medida que pasaban os minutos. Un bo inicio de set non foi suficiente para que as lucenses sumasen o punto do terceiro tempo, caendo tamén neste e cun resultado final dun 0-3.
Os erros das loitadoras e a falta de ritmo castigan ao Emevé
Malia sumar máis puntos desde o ataque, a verdadeira diferenza no marcador de galegas e canarias estivo no relativo aos erros do adversario.
As loitadoras fallaron moito máis durante o partido, o que lle permitiu ao cadro de Saurín facerse con 23 puntos que foron vitais nun partido moi disputado.
Outro aspecto que deberán mellorar as lucenses de cara ao próximo encontro é o aguante do ritmo do partido. En todos os sets as lucenses comezaron adiantándose e con vantaxe no marcador, para ser superadas polo rival no ecuador de cada tempo.
Finalmente, non foi posible sumar puntos en casa e as xogadoras galegas terán unha nova oportunidade no inicio da segunda volta, contra o Sanaya Libby’s La Laguna.
FICHA TÉCNICA
CV ARENAL EMEVÉ: Carolina Camino, Marie Alford, Inma Lavado, Sara Urrea, Carla Jiménez, Lucía Prol. Tamén xogaron: Leann Bujan (líbero), Ainara Burgo, María Sanjurjo e Marta Otero.
IBSA CV CCO 7 PALMAS: Saray Manzano, Carine Gadelha, Ana Galvao, Lisa Arbos, Lucía Varela e Victoria Foucher. Tamén xogaron: Ariadna Priante, Alba Sánchez (líbero) e Claudia Hernández.
SETS: 23-25/ 18-25 / 19-25 (0-3)
ÁRBITROS: Rubén Sánchez e Diego Rodríguez.
INCIDENCIAS: Partido correspondente á undécima xornada da Liga Iberdrola de voleibol no Pavillón Municipal de Deportes de Lugo ante 250 espectadores.
