“Elvi” convértese na segunda xogadora de A Fervenza en renovar

A Fervenza segue a confeccionar o seu plantel de cara á vindeira tempada. Tras a renovación do técnico e da capitá, agora é a quenda para “a veterá”, “a vindeira”, Elvi, que con esta, cumprirá a súa cuarta tempada co club ferrolán. Desde o club rosa quixeron entrevistala e coñecer un pouco máis a unha das xogadoras máis importantes da plantilla de Chipi.

Pregunta: Que tal? Como che atopas?

Resposta: Ben, botando moito de menos o fútbol sala.

P: Dicir que es a veterana do equipo con tan só 25 primaveras ás túas costas, igual é un pouco ousado, pero é unha realidade. Como o levas?

R: Pois é algo curioso ao que te acabas afacendo. A verdade é que ten moito mérito e fala moi ben do proxecto. Todos os anos saen boas xogadoras. Son moi novas, pero son capaces de competir nunha categoría complicada e tan igualada como Segunda División.

Elvi, xogadora de A Fervenza: “Todos os anos saen boas xogadoras. Son moi novas, pero son capaces de competir nunha categoría complicada e tan igualada como Segunda División”.

P:  Que vantaxes e que inconvenientes ten, á túa parecer, contar cun equipo tan novo?

R: Vantaxes, que son nenas que teñen unha ilusión tremenda, con todo o futuro por diante no fútbol sala e moitas ganas de aprender. Inconvenientes, quizais á hora dos partidos sexan menos contundentes ou teñan menos experiencia que outras xogadoras que levan xogando máis tempo e, nalgunhas circunstancias ou partidos, iso percíbese.

P:  Xa centrándonos na renovación, facendo nosas as letras de BURNING, que fai unha moza como ti nun sitio como leste? que clase de aventura viñeches a buscar?

R: Cheguei a Ferrolterra por estudos e hoxe en día estou moi contenta porque podo compaxinar a miña paixón, que é o fútbol sala, co meu traballo.

P:  Cal é o secreto para, en tan só 3 tempadas, e sendo a única xogadora de fóra da Comarca, sexas unha das máis queridas e apreciadas dentro do vestiario?

R: (Risas) Isto non debería respondelo eu. Sempre tento achegar e sumar. Síntome valorada e apreciada neste equipo e estou moi agradecida por iso.

P:  Gustaríanos saber a túa valoración da túa estancia no Club desde a túa chegada alá polo ano 2017.

R: Desde que cheguei sentín unha máis, síntome moi cómoda neste equipo porque todos fanche sentir dentro dunha familia. A nivel deportivo creo que aprendín moito ao longo destes anos.

Cada tempada que pasa ves a evolución das nenas e outras novas que van entrando; é moi enriquecedor. Só espero que a tempada que vén podamos seguir na liña de crecemento e dar un pasito máis en canto a competitividade e resultados.

Elvi, xogadora de A Fervenza: “Desde que cheguei sentín unha máis, síntome moi cómoda neste equipo porque todos fanche sentir dentro dunha familia. A nivel deportivo creo que aprendín moito ao longo destes anos”.

P:  Que é o que máis che gusta da nosa Comarca?

R:  O que máis me gusta da Comarca é a variedade de paisaxes, tedes unhas praias incribles, pobos preciosos, as Fragas….non lle falta de nada.

P: Que é o que máis botas de menos do teu Ribadeo natal?

R:  De Ribadeo boto de menos á miña familia e aos meus amigos. Por sorte non hai demasiada distancia.

P:  Cóntanos como foron os teus comezos no fútbol sala.

R:  Empecei xogando no colexio, despois apunteime a un equipo onde xogaba con nenos, ata que se fixo un equipo de nenas.

P:  O teu ídolo ou referente no futsal é…

R:  Lucía Nespereira porque sempre me chamou a atención o seu carisma, a súa garra e a forma en que afronta os partidos.

Elvi, xogadora de A Fervenza: “Lucía Nespereira porque sempre me chamou a atención o seu carisma, a súa garra e a forma en que afronta os partidos”.

P:  A mellor xogadora actual é…

R: Para min, Anita Luján.

P:  A mellor porteira…

R:  Silvia Aguete.

P:  A mellor compañeira coa que compartiches vestiario…

R: Se falamos de calidade e talento, diría que Cilene.

P: Se puideses, a que xogadora ficharías para o proxecto da Fervenza na tempada 2020-2021? Por que?

R:  Uff, non sabería dicirche nomes , calquera que veña con ganas de achegar e aprender, será ben recibida.

P:  E, para finalizar, un reto: serías capaz de definir cunha soa palabra ou adxectivo a cada unha das túas compañeiras?

En canto ao deportivo.
Lucía – reflexos.
Clara – traballo.
Inés – ilusión.
Ra – carácter.
Belén – constancia.
Sabela – entrega.
Nata – seguridade.
Claudia – intelixencia.
María – calidade.
Cris – talento.
Carmen – desenvoltura.
Julia – futuro.
Otero – garra.

P:  E aos técnicos?

Chipi – fenómeno.
Fran – paixón.
Gelo – gañas.
Noé – entusiasta.