A líbero Eliana González regresa a Lugo para competir como loitadora do CV Arenal Emevé. Despois de dúas tempadas no Cajasol Dos Hermanas facendo grandes números, a xogadora consolídase como unha das máis destacadas da Liga Iberdrola ou Superliga 1.
O seu ex e futuro adestrador José Valle mostrouse moi contento pola súa chegada. Sobre González declarou que “creo que vai axudar moitísimo a atopar a estabilidade que estamos buscando”.
A xoven xogadora chega para reforzar a defensa e a recepción do Emevé, despois de entrar entre as tres mellores líberos da máxima categoría do voleibol español segundo as estatísticas da RFEVB. González tamén foi quen de entrar no septeto ideal en catro xornadas.
Entre os equipos da súa carreira atópanse nomes como Haro Rioja, UCAM Murcia, Voley Logroño e o máis recente, o Cajasol Dos Hermanas. O seu palmarés inclúe unha Liga Iberdrola, unha Copa da Raíña e unha Supercopa de España.
Eliana González ten pasado loitador
Ademais, durante a súa etapa previa como loitadora, foi unha das artífices do ascenso a Liga Iberdrola e o subcampionato da Copa Princesa.
Para o adestrador José Valle, que xa a tivo ás súas ordes na súa primeira etapa en Lugo, González é “unha das mellores xogadoras do campionato na súa posición e, a pesar da súa xuventude, é un referente dentro e fóra da cancha. Aportará madurez e estou seguro de que o noso xogo defensivo será aínda máis sólido grazas a ela”.
José Valle: “É unha das mellores xogadoras do campionato na súa posición e, a pesar da súa xuventude, é un referente dentro e fóra da cancha”
O técnico tamén quixo destacar o apartado persoal, que non sae nas estatísticas, pero é igualmente imporante. Así, sobre a líbero sinalou que “é unha persoa que axuda a todo o equipo, fai crecer o equipo, que sempre está animando ás súas compañeiras e iso para calquera estrutura é moi importante”.
A volta de Eliana González engádese á renovación de Carolina Camino e a fichaxe de Yael Castiglione nos primeiros pasos da construcción das loitadoras para a 2020/2021. O Emevé traballa con previsión para elaborar un plantel de máximas garantías e consolidarse na elite do volei español.
