A internacional española Elena García Martos (Ibi, 1996), máis coñecida como Elenita, será unha das Guerreiras Laranxas na vindeira tempada. A futbolista defenderá as filas do Pescados Rubén Burela FS no curso 2021/2022 na Primera División.
“Despois de tanto tempo saio da miña terra, da miña zona de confort, para asumir un novo reto co que estou moi ilusionada”, declara a nova xogadora laranxa.
A peche alacantina recalará na Mariña con contrato ata 2023, tras 6 exercicios na UA, converténdose na primeira novidade das Guerreiras Laranxas nun novo duelo coa Historia.
A traxectoria de Elenita
O comezo de Elenita no futsal estivo ligado á súa terra, formándose no Santa Rosa de Alcoy e evolucionando e medrando no Universidad de Alicante.
Para a próxima campaña, a xogadora de 24 anos cambia de aires e estrea unha nova etapa. “Estou moi ilusionada. A clave foi ter a oportunidade de seguir medrando cun club marabilloso e un equipo excepcional no que espero achegar o mellor de min. Teño por diante o desafío de competir contra min mesma para superarme, despois da estrea coa Selección Española o decembro pasado”, adiantaba a nova guerreira laranxa.
Nas vindeiras semanas, o club do Pescados Rubén Burela presentará oficialmente á alicantina nas vindeiras semanas.
