A zagueira galega Elena Vázquez proclamouse subcampioa do Mundo coa Selección Española de fútbol Sub-17. A futbolista milita no RC Deportivo ABANCA e defende tamén a elástica da Irmandiña. De feito, a xogadora de Carballo é capitá da Selección Galega de fútbol en categorías inferiores.
España caía derrotada na final na quenda de penalties. A Selección Española foi por diante no marcador durante un tempo (gol de Celia Segura no minuto 60) da final pero a RPD de Corea conseguiu empatar o choque no minuto 64. O partido remataba en táboas cun tanteo de 1-1.
Foi desde o punto de penalti e xa co tempo cumprido cando as coreanas se impuxeron as españolas (4-3), entre das que estaba a galega Elena Vázquez Brandón (Carballo, 8 de outubro de 2007).
España conseguía así a medalla de prata no Campionato do Mundo de fútbol Sub-17. O conxunto español está adestrado por Kenio Gonzalo e pelexou ata o final pola vitoria. O Mundial celebrouse na República Dominicana. España buscaba o seu terceiro título consecutivo pero non puido ser.
Ver esta publicación en Instagram
Para chegar á final ante a RPD de Corea previamente España vencía a Inglaterra nas semifinais cun marcador de 3-0. Nos cuartos de final a Selección Española de fútbol Sub-17 superaba con contundencia a Ecuador 5-0.
Elena Vázquez, xogadora do Dépor ABANCA, tivo minutos durante este Campionato do Mundo. De feito, chegou a saltar ao campo no once inicial nalgunha ocasión. España finalizaba a 1.ª Fase da competición con vitoria ante Colombia (1-2), logo de vencer a EE.UU. (3-1) e á República de Corea (5-0).
Elena Vázquez subcampioa de Europa Sub-17 con 15 anos
En maio de 2024 Elena Vázquez renovaba co Dépor ABANCA ata o ano 2028. Trátase dunha xogadora que se move nos postos de central ou lateral zurda e que vén demostrando unha gran proxección.
A futbolista de Carballo pasou polo Orzán SD, o Dépor ABANCA B e xa é unha habitual nas convocatorias de Irene Ferreras no primeiro equipo do Dépor ABANCA.
A defensa de Carballo chegou a ser subcampioa de Europa coa Selección Española Sub-17 antes deste subcampionato do mundo. Daquela Elena Vázquez tiña só 15 anos. A zagueira branquiazul debutou co RC Deportivo ABANCA nun amigable co Deportivo Alavés Gloriosas disputado o 17 de febreiro de 2023.
A Selección Española Sub-17 de fútbol é a vixente campioa de Europa. Nese torneo participou outra deportivista, Lucía Rivas, que se recupera dunha lesión de xeonllo.
Os resultados de España no torneo foron os seguintes:
Primeira Fase
- ESPAÑA 3 – ESTADOS UNIDOS 1
- ESPAÑA 5 – REPÚBLICA DE COREA 0
- COLOMBIA 1 – ESPAÑA 2
Cuartos de final
- ESPAÑA 5 – ECUADOR 0
Semifinais
- ESPAÑA 3 – INGLATERRA 0
Final
- ESPAÑA 1 – COREA DEL NORTE 1. A penaltis: 3-4
MIRA AQUÍ O RESUMO DO PARTIDO DA FINAL DO MUNDIAL SUB-17 ENTRE RPD DE COREA VS ESPAÑA
FICHA TÉCNICA
RPD DE COREA: Ju gyong Pak, Ye Guong Ri, Pok Ypng Jon, Ryu So (Yon A Choe, 60′; Pok Yong Jong, 90′), Rim Jong Choe, Kang, Il Sim Pak, Il Son Choe (Kyong Ho, 44′), Pom Ri, Kuk Hyang Ri, Un Hyang Ro.
ESPAÑA: Laia López, Martina González, Nerea Carmona, De la Cuerda, Aiara, Irune Dorado, Ainoa Gómez (Emma, 90′), Serrajordi (Noa Ortega, 90′), Celia Segura, Pau Comendador, Alba Cerrato (Iris, 81′).
GOLES: 0-1 | Celia Segura | Minuto 60, 1-1 | Il-Chong Jon | Minuto 64,
EQUIPO ARBITRAL: Colexiada principal Daiane Muniz (BRA). Asistentes: Maira Moreira (BRA) e Fernanda Antunes (BRA). Cuarto árbitro: Carly Shaw-Maclaren (CAN)
INCIDENCIAS: Final do Campionato do Mundo Sub-17 femenino de fútbol disputada no Estadio Olímpico Félix Sánchez (Santo Domingo, República Dominicana). Durante o Mundial, a Selección Española tivo un recordo para Valencia nestes duros momentos logo da catástrofe ocasionada pola DINA.
❤️ Por vosotros
Os tenemos muy presentes en la final de la Copa del Mundo
¡ÁNIMO VALENCIA!#U17WWC pic.twitter.com/RWz2hdEZ1c
— Selección Española Femenina de Fútbol (@SEFutbolFem) November 3, 2024
