As diferencias foron mínimas en todos os percorridos desta sétima edición do Trail e Andaina de Orientación de Orro organizado polo Clube Gallaecia Raid e A.D.T.L. A Pedrosa. Iso da conta da esixencia e capacidades dos deportistas alí presentes. No tocante ó trail longo, en categoría feminina, só un segundo separou á gañadora, Elena Bujía, da segunda clasificada, Marta García. Un minuto por detrás remataba Sandra Fernández.
As diferencias tamén foron moi escasas no percorrido curto, con menos de cinco minutos entre as tres primeiras clasificadas: Tania López, Carmen Casal e Alexia Loreiro.
Orro / GALLAECIA RAID
A pesares do aprazamento da 7ª edición do Trail e Andaina de Orientación de Orro, a acollida foi inmellorable, grazas aos 429 inscritos que se acercaron ó Concello de Culleredo nunha soleada mañá de xaneiro. Unha vez máis, o Clube Gallaecia Raid e a A.D.T.L. A Pedrosa organizaban esta proba, agora xa clásica, das carreiras de orientación e dos trails da comunidade.
Ao igual que na edición anterior, os inscritos podían escoller entre os 20 km con 700 metros de desnivel positivo do trail longo, unha variante máis asequible de 12 km e 350 metros de desnivel e, como non, a andaina de 9 km de percorrido e 300 metros de desnivel positivo. Este último percorrido foi o escollido pola maior parte dos inscritos, buscando pasar unha mañá de domingo en familia, dada a gran cantidade de nenos presentes na saída da proba, con epicentro na parroquia cullerdense de Orro.
A proba comezaba ás 10:00 horas, coa saída en masa de tódolos corredores do Trail, que afrontaban a proba como un adestramento para comezar a preparar a nova tempada das carreiras orientación. O resto de categorías tomaban a saída un pouco máis tarde: Ás 10:10 horas saían os corredores do trail curto e, 5 minutos máis tarde, os 288 participantes na andaina.
Numerosas persoas inscritas na andaina
A Andaina contaba coa maior inscrición dos dous percorridos, na que moitos dos participantes facían o percorrido en familia, descubrindo na súa gran maioría o deporte da orientación.
Nesta opción deportiva, os máis pequenos poideron gozar dunha mañá de balizas, compases, mapas e diversión, nun entorno natural que lles permitiu introducirse en localizacións novas para a gran maioría destas pícaras e pícaros.
O ambiente de carreiras que se respiraba fixo que os participantes neste sétimo Trail de Orientación de Orro (Concello de Culleredo) puxesen todo o seu empeño en chegar a meta coa satisfacción de realizar unha carreira de aprendizaxe e desenvolvemento de técnicas de orientación para os xa iniciados.
Resultados masculinos do Trail de Orientación de Orro
Entre os participantes nesta proba deportiva dentro da categoría masculina tamén houbo bastante igualdade. Con menos de dous minutos de vantaxe sobre o segundo clasificado, a vitoria foi a parar a mans do deportista Ángel García. Este participante deun en completar a proba cun tempo de 1h e 37 min.
O segundo lugar no poidio masculino sería, nesta ocasión, para Óscar Fernández. Mentres que terceiro posto correspondeulle a Isaac Rodríguez, a dez minutos do segundo clasificado nesta proba.
Xa no percorrido curto, entre os homes, Alfonso Vázquez conseguía chegar primeiro, con Diego Bouza segundo e Luis Javier Ramos pechando os postos de honor.
Dende o Clube Gallaecia Raid e A.D.T.L. A Pedrosa agradeceron a todas as persoas participantes a súa asistencia, ao tempo que agradeceron o seu traballo a voluntarios, Concello de Culleredo, Policía Local, Protección Civil, Coca-Cola, Marathon Running Shop, Marmar Outdoor, ArteBike Arteixo, NoSportLimit, Maldita Buena Suerte, Arcadia, BikeSat, Bibi´s Natura e TrackTheRace pola súa colaboración.
A seguinte cita será o próximo mes de decembro en Orro, xa na oitava edición deste trail de orientación.
