Electrónica Eutimio xa é patrocinador do Club Balonmán Atlético Guardés. Esta empresa de tecnoloxía naval fundada hai máis de 30 anos na Guarda é a primeira ‘fichaxe’ que a entidade dá a coñecer publicamente dentro do equipo de patrocinadores privados que este ano darán un sustento económico vital para o club.
O presidente do Guardés, Jesús López, que onte asinou o convenio con Maite Carrera, directora financeira da tecnolóxica, e Pablo Carrera, CTO da empresa, celebra a chegada de novos patrocinadores: “É unha gran noticia que empresas da Guarda estean a dar un paso á fronte, oxalá pronto sexan moitas máis”, desexa López. Ao acto de presentación tamén asistiron as tres capitás do equipo de División de Honra: África Sempere, Marisol Carratú e Lorena Pérez.
Jesús López, presidente do Atlético Guardés: “É moi importante para poder afrontar esta tempada con relativa tranquilidade contar co apoio de moitos patrocinadores privados e traballar para conservalos moito tempo”
“En primeiro lugar, quero agradecer a Electrónica Eutimio que aposten por nós e máis nestes momentos de tanta incerteza”, recoñeceu o presidente durante a firma do convenio, engandindo que “é moi importante para poder afrontar esta tempada con relativa tranquilidade contar co apoio de moitos patrocinadores privados e traballar para conservalos moito tempo”. Tamén lle trasladou o seu agradecemento ao equipo directivo do club que está a facer un enorme traballo contactando con empresas de Galicia e que tamén se moven a nivel nacional, confiando en que todo ese empeño siga dando boas novas como este convenio.
Pola súa banda, Maite e Pablo Carrera agradeceron “a oportunidade brindada polo Atlético Guardés para formar parte da traxectoria deste club que, desde ben pequenos, vimos crecer e proxectarse a nivel europeo”. Ademais, confesaron que como guardeses se senten tremendamente orgullosos deste equipo e da decisión da nova directiva de contar con eles e así potenciar e priorizar o apoio local”.
Maite Carrera, directora financieira de Electrónica Eutimio: “Ilusiónanos formar parte dun club que formou, durante tanto tempo, parte da nosa familia, pois durante anos, a nosa curmá foi un alicerce importante no equipo”
Para ambos directivos da empresa o vínculo co Guardés vai máis aló do patrocinio: “Ilusiónanos formar parte dun club que formou, durante tanto tempo, parte da nosa familia, pois durante anos, a nosa curmá foi un alicerce importante no equipo. Ademais, afirmaron que se senten identificados co club xa que compararon que tanto o Guardés como Electrónica Eutimio, naceron dun proxecto humilde e familiare hoxe en día vense envoltos nun despunte a nivel internacional. Por último, quixeron trasladar unha mensaxe para a nova Xunta Directiva da entidade: “Confiamos na nova directiva e no seu propósito do bo facer para que o Club continúe competindo na elite europea”, desexan.
Electrónica Eutimio suporá un piar fundamental para o clube
A empresa chega ao Guardés demostrando un forte compromiso co club deportivo. A tecnolóxica unirá a súa imaxe á da entidade e o logo de Electrónica Eutimio poderase ver no frontal das camisetas coas que o equipo de División de Honra competirá en Liga Guerreiras Iberdrola 20-21, Copa da Raíña 20-21 e EHF Challenge Cup. Tamén as categorías inferiores do club lucirán uns equipamentos novos idénticos.
https://twitter.com/Atlguardes_ofic/status/1296376351038087168?s=20
Desde Electrónica Eutimio valoraron de maneira moi positiva o alcance que o Guardés ten na Guarda pero tamén en Galicia e España, cun importante seguimento dos medios locais e coa repercusión da canle temática Teledeporte. Así, esta empresa guardesa que traballa de maneira global aliña a súa proxección cun club que competirá por noveno ano consecutivo na elite do balonmán feminino español.
Ademais, a compañía poderán aproveitar a imaxe do persoal para accións de promoción e verán a súa imaxe presente en cartelería oficial do club ou streaming dos partidos oficiais, onde se promedian unhas 3000 visualizacións.
