Eibar Rugby Taldea remonta o partido ao CRAT Residencia Rialta (24-19)

Finaliza a primeira volta da liga Iberdrola cunha nova derrota do CRAT Residencia Rialta a domicilio.

As coruñesas non puideron manter unha vantaxe que chegou a ser de 14 puntos. Con este resultado, o CRAT Residencia Rialta distánciase dos postos de cabeza e métese de cheo na parte baixa da táboa, convertendo, ademais, a Eibar Rugby Taldea nun rival directo. Dúas vitorias e cinco derrotas reflicten un balance que obriga ao equipo galego a facer unha segunda volta de matrícula de honra para poder chegar ás eliminatorias polo título.

O Eibar Rugby Taldea comezou forte. As xogadoras locais necesitaban sumar unha vitoria, talvez mesmo máis ca o CRAT Residencia Rialta. Un ensaio no minuto 4 para as armeiras permitíalles encarar o encontro con algo máis de tranquilidade. Primeiro Judith e logo Maria Morant chegaron á zona de 22 con intención de dar a réplica, pero as locais souberon parar o avance coruñés. O CRAT tomaba o control do partido.

O xogo non era todo o rápido que buscaban as galegas. Eibar Rugby Taldea buscaba a percusión, as súas ás non tiñan profundidade. O CRAT Residencia Rialta puido romper en varias ocasións a férrea resistencia eibarresa. Primeiro foi Quen, que errou no pase tras unha gran xogada. Despois, a seu compatriota Kyra avanzou imparable ata o 22 pero non tivo continuidade.

Finalmente e nun momento clave, a dous minutos do descanso, unha combinación entre Kyra e Quen rematouna esta última cun pousado con firma neerlandesa. Alejandra transformou para darlle ao CRAT sete puntos de vantaxe no intermedio.

O CRAT Residencia Rialta comezou a segunda parte de modo abafador aproveitando a tarxeta amarela que recibiu Sambu a un minuto do descanso. Unha excelente carreira de Selene tivo continuidade no xogo e o colofón púxoo Nicky cun novo ensaio. Alejandra sumou dous puntos máis para o cadro coruñés ao mandar o balón entre paus.

Empate do Eibar

Un roubo preto da liña de ensaio permitiu ás locais recortar diferenzas e meterse de novo no partido. Desde o ensaio de Nicky Dix, Eibar foi máis protagonista e a súa anotación dáballe unha vida extra. O CRAT Residencia Rialta defendía o empuxe local, fase tras fase, pero non conseguía xogar o balón no campo rival. E chegou o ensaio do Eibar Rugby Taldea no minuto 65 por medio de Hosanna Aumua. Fallou Copeland na transformación pero o árbitro ordenou repetir a patada. E á segunda, empatou o partido. Volta a empezar con menos dun cuarto de hora por diante.

As sensacións non eran boas, Eibar Rugby Taldea non paraba de presionar. As armeiras ensaiaban de novo no minuto 74. Tocaba épica para remontar un partido no que o CRAT Residencia Rialta chegou a ir mandando de 14 puntos. Ceci levou o balón preto da liña de ensaio. Era o último empuxe.

As coruñesas tentaban loitar contra o Eibar Rugby Taldea e tamén contra o reloxo. Pero era tarde xa. Eibar selou a súa segunda vitoria da tempada. O CRAT sumou o seu cuarto partido perdido de modo consecutivo. Un encontro que tiña de fronte pero que se lle escapou.

Non lles queda outra ás coruñesas que afrontar o pau que supón caer en Eibar e pensar xa no seguinte compromiso. O único positivo, o punto por bonus defensivo que sumaron as herculinas.

Sant Cugat espera a próxima fin de semana. A súa dinámica é completamente oposta á das coruñesas. As catalás levan cinco vitorias seguidas. É é o que necesita o CRAT Residencia Rialta, reengancharse ao camiño das vitorias, canto antes. A segunda volta debe ser a da redención.

FICHA TÉCNICA

24) EIBAR RUGBY TALDEA: Islam (min. 29 entra Edurne Vidal, á súa vez substituída no min. 53 por Natale Murray), Doha, Rianna Aspinall (min. 63 entra Patricia Khumalo); Águeda (min. 63 entra Jone Carral), Eider; Aleuzenev Cid, Nerea García, Hosanna Aumua; Stefi Hooson, Cheyne Copeland; Adara (min. 42 entra Raquel Rise), Oraçao Sambu, Lide, Paula Ghiorzi e Amaiur.

19) CRAT RESIDENCIA RIALTA: Nicky, Ali, Maica; Kyra, Pimi (min. 72 entra Rumi); Judith, Maitane, Maria Morant; Alba, Alejandra (min. 55 entra Anita); Tania, Quen, Ceci, Selene e Elsa.

ANOTACIÓNS