O Atlético Guardés regresa de Ucraína cos deberes feitos. O conxunto galego impúxose con relativa solvencia ao HC Galychanka (16-24, 8-13) nun partido celebrado hoxe, domingo 14 de febreiro, ao mediodía en Lviv correspondente á ida dos cuartos de final da EHF European Cup.
O equipo que adestra José Ignacio Prades ten previsto iniciar esta noite, domingo, a súa viaxe de regreso a casa (Lviv-Istambul-Madrid-Vigo) coa idea de chegar mañá, luns 15, pola tarde á Guarda. Todo a expensas do temporal de neve que azouta a zona. Antes de recibir ao equipo de Vita-liy Andronov na Guarda. O cruce de volta está fixado para o domingo 21 de febreiro ás 19:00 horas e será transmitido pola TVG2.
O partido comezou de cara para o Guardés. O equipo de José Ignacio Prades entrou á pista moi concentrado e con ganas de marcar o ritmo do partido. Primeiro foi Sarah Valero (0-1), a resposta de Poliak (1-1), outro gol do pivote hispano-francesa (1-2), Markevych (2-2), Moreno (2-3) e Konovalova (3-3). E aí rompeu o partido.
O Guardés subiu un par de marchas, apertou en defensa para poder correr á contra e a pesar dos intentos locais abríase unha primeira brecha: 3-7. Poliak, a máis destacada das ucraínas con 7 tantos, tiraba do carro e rompía a seca local (Min. 11:05, 4-8). Foron minutos de pouco rédito para ambos os conxuntos, incapaces de ver portaría durante máis de sete minutos. Pero mesmo neses algarismos máis pobres, o Atlético Guardés seguía tranquilo e por diante no marcador.
As galegas do Guardés aumentan a sua vantaxe
O Atlético Guardés seguiu insistindo e a través de Arcos e Santiago conseguiu ampliar a renda para que Rajnohová asinase o 6-13, a diferenza máis ampla até o momento. As ucraínas non se rendían e para pechar o primeiro acto cultivaron un parcial de 2-0 (8-13). E chegou o atasco visitante.
A segunda parte comezou condicionada pola exclusión de Barbosa e a falta de atino de face a portaría. Demasiado lastre para as de Prades e un sopro de aire fresco para o Galychanka, que se puña a 2 (12-14). Non quedou máis remedio ao técnico que ter pedir tempo morto para refrescar as ideas do seu equipo e evitar que un partido que estivo controlado desde o principio fósese a uns camiños máis perigosos.
Entre Buforn, Valero e Urban soltando a boneca o partido volveu á súa canle e de novo no 47′ o Atlético Guardés recuperou a súa renda de 6 tantos (12-18). Sen desmerecer, está claro, que o partido se cimentou na defensa e nunha Marisol Carratú que con 19 paradas foi unha das claras protagonistas do partido.
Ao Atlético Guardés só quedábanlle por diante minutos de saber xestionar e manter a súa renda. Aínda se puxo a catro goles o Galychanka (15-19), pero as galegas non querían sorpresas e non dubidaron en sentenciar para regresar á Guarda cun colchón de 8 goles que dá moitas esperanzas de cara a pór os dous pés nas semifinais da terceira competición continental.
José Ignacio Prades: “Foi un partido complicado”
“O resultado fai xustiza ao traballo e esforzo das mozas, que se baleiraron en defensa para contrarrestar o xogo tan duro do rival”, recoñeceu Prades ao termo do choque.
O técnico quixo analizar a vitoria nun “partido complicado” pero cuxo resultado “reflicte que o equipo estivo moi ben no tramo final, pero sobre todo destacaría que entramos moi ben ao partido, cunha eficacia moi alta na porcentaxe de lanzamento que nos axudou a coller confianza”, resaltou.
José Ignacio Prades, adestrador do Atlético Guardés: “Entramos moi ben ao partido, cunha eficacia moi alta na porcentaxe de lanzamento que nos axudou a coller confianza”
O técnico das galegas tampouco quixo pasar por alto os primeiros minutos do segundo acto: “o inicio da segunda parte tivo momentos nos que nos custaba anotar, pero compensámolo con defensa e achega en portaría”, celebrou José Ignacio Prades no polideportivo de Lviv.
Seguintes citas das galegas, en Huerta del Rey e na Sangriña
Para afrontar a volta desta eliminatoria europea, as galegas contan cun colchón de oito goles. O cruce da Sangriña terá como colexiados a Justas Ivanauskas e Edvinas Jencevicius (Lituania).
Antes, espéraas en Huerta del Rey o conxunto do Aula Alimentos de Valladolid. Será o xoves 18 de febreiro ás 19:00 horas en cruce correspondente á 12ª xornada da Liga Guerreras. Dirixirán o partido os colexiados David Monjo (Madrid) e Miguel M. Soria (Comunidad Valenciana).
FICHA TÉCNICA
16) UKR HC GALYCHANKA LVIV: Olesia Diachenko, Nataliia Shypliak, Iryna Prokopiak, Mariana Markevych (3), Yuliia Holovko, Olga Vasyliaka, Viktoriia Saltaniuk, Oleksandra Furmanets (1), Anhelina Ovcharenko, Mariia Gladun, Khrystyna Maikut, Maryna Konovalova (1), Kateryna Kozak, Anastasiia Melekestseva, Diana Dmytryshyn (4) e Tetiana Poliak (7).
24) CLUB BALONMÁN ATLÉTICO GUARDÉS: África Sempere, Sandra Santiago (2), Lorena Pérez (2), Estefanía Descalzo, Míriam Sempere, Paulina Buforn (4), Patrícia Lima (3), Cristina Barbosa, Rosario Urban (1), Paula Arcos (4), Sarah Valero (4), Carla Gómez, Marisol Carratú, Erika Rajnohová (3), Laura Morais e Daniela Moreno (1).
ÁRBITROS: Andrzej Chrzan e Michal Janas (Polonia). Excluíron por parte das locais a Poliak, Maikut e Markevych e das visitantes a Barbosa, Descalzo e Rajnohová.
PARCIAIS CADA 5 MINUTOS: 3-3, 3-7, 4-8, 5-10, 6-12, 8-13 (descanso), 11-14, 12-14, 12-16, 13-18, 15-19, 16-24.
INCIDENCIAS: Partido correspondente á ida dos cuartos de final da EHF European Cup disputado no polideportivo de Lviv con 50 espectadores.
