A conta atrás para Toquio2020 está nas mentes de moitas deportistas galegas. A vela é unha das disciplinas nas que Galicia ten posibilidades de alcanzar bos resultados. Mañá, luns 10, dúas galegas empezan a competir na última proba importante de cara a esa gran cita olímpica. Trátase de Támara Echegoyen e de Patricia Suárez. Elas, coas súas respectivas tripulantes, arrancan a súa participación no Mundial de 49er FX en Geelong (Australia). Pero saben que se xogan moito máis que un Mundial, por se iso fose pouco. España ten so unha praza nesta categoría para competir en Toquio. Aínda non se decidiu que tripulación a ocupará.
Ao tratarse do último Campionato do Mundo antes dos Xogos Olímpicos de Toquio2020, estamos ante unha proba crucial para ver en que momento de forma chegan as tripulacións para loitar polo ouro olímpico. Así que, posiblemente, na decisión final de que españolas estarán alí, esta proba teña moita luz que aportar.
Echegoyen e Barceló, do equipo Movistar, veñen de proclamarse vencedoras do Campionato de Oceanía no mesmo escenario. Támara, ademais, sabe o que é colgar do peito un ouro olímpico, fíxoo en Londres. A súa traxectoria está en ascenso nos últimos meses, pero Patricia Suárez e Nicole van der Velden foron as que conseguiron a praza para o 49er FX español e non lles van á zaga. O único case seguro é que a representación española en Toquio, no que á clase 49er FX se refire, falará galego.
Último test antes dos Xogos
Saben que se xogan un lugar nos Xogos Olímpicos e que so hai sitio para un barco. Sexa cal sexa a decisión da dirección técnica da Federación Española de Vela, é tamén momento para aprender do que as elixidas se atoparán en Toquio. A bo seguro que cada tripulación da flota mirará de esguello para os rivais que se atopen no campo de regatas non so para amosar o seu músculo de cara á cita olímpica, se non tamén para saber cales son as eivas que as principais competidoras poderán ter e tirar partido delas nos XX.OO. se teñen ocasión.
Así, Geelong é evidentemente unha carta de presentación e tamén unha proba fundamental para chegar con forza en moral alta a Toquio. Como decimos, Tamara Echegoyen e Paula Barceló (Movistar), así como Patricia Suárez e Nicole van der Velden (Grupo Profand) serán as españolas presentes na clase 49er FX neste campionato que comeza en Australia.
O resto de representación española a conforman Diego Botín e Iago López Marra (Quirón Salud) en 49er, e Tara Pacheco e Florián Trittel en Nacra 17. En total haberá catro tripulacións de España nas cales atopamos a dúas galegas.
Así será a competición en 49er, 45 en 49er FX e 38 en Nacra 17
Neste Mundial danse cita 80 participantes en 49er, 45 en 49er FX e 38 en Nacra 17. As diferentes embarcacións se medirán en seis días de regatas. No caso dos 49er FX, clase na que compiten as galegas, primeiro haberá Series Clasificatorias e logo Series Finais, para logo cheghar as Medal Race previstas para o sábado 15. A esta última fase competitiva so chegará o Top 10.
Segundo informa a Federación Española de Vela, no caso das tripulacións de 49er FX haberá “dous grupos nas Series Clasificatorias, cun máximo de nove probas. Xa nas Series Finais, os primeiros 25 barcos clasificados conformarán o grupo Oro, quedando o resto da clasificación integrada no grupo Prata e Bronce”, se fose preciso. Aquí habería oito regatas, “tres e tres os días 13 e 14 de febreiro, e dous o último día, xusto antes da disputa da Medal Race”.
A organización da proba dispuxo seis campos de regata. Hainos na zona interior e na exterior da bahía de Corio. A idea, é que o Comité poida optar por uns ou outros en función das condicións de vento que se dean en cada momento.
Echegoyen e Barceló acaban de gañar en Geelong a Oceanía Championship
Hai nada, do 30 de xaneiro ao 3 de febreiro Geelong acollía o Campionato de Oceanía. Na competición tamén participaron as galegas Echegoyen e Suárez, pero correron diferente sorte. Támara Echegoyen e Paula Barceló (Movistar) foron campionas. Asinaron tres primeiros lugares, un segundo e dous terceros, eliminando o undécimo lugar da segunda regata e mellorando así a puntuación global das segundas, as neozelandesas Alexandra Maloney e Molly Meech.
Patricia Suárez e Nicole van der Velden (Grupo Profand), finalizaron a competición en decimoterceira posición. Un terceiro lugar na primeira xornada foi a súa mellor regata mentres que unha bandeira negra lles limitaba a eliminación de algún dos dous 15º postos que asinaron nas regatas dúas e tres e que condicionaron a súa puntuación final.
Con todo, esta competición so foi un petisco de cara á que agora comeza e que decidirá boa parte das papeletas para estar nos Xogos Olímpicos de Toquio 2020 nuns meses.
2020 49er, 49er FX & Nacra 17 Oceania Champs – Final Day from Ben Remocker on Vimeo.
