A piques estivo Támara Echegoyen de repetir fazaña olímpica. A galega xa sabe o que é colgarse un metal olímpico, pero desta vez ten que contentarse co diploma. Ela, e a súa compañeira Paula Barceló, remataron cuartas na final do 49er FX.
As españolas quedaron a un só punto do podio. Cun total de 89 puntos, o 49er FX foi cuarto, quedando por detrás dos 88 puntos das neerlandesas Bekkering e Duetz, dos 83 das alemanas Lutz e Beucke e dos 76 das brasileiras Grael e Kunze.
A Medal Race de Echegoyen
O equipo español chegou á final dos Xogos Olímpicos de Toquio 2020 en pleno estado de forma. A galega e a balear arrancaban esta Medal Race en cuarta posición, con opcións de medalla.
Na disputa da Medal Race, atrasada un día polo escaso vento para competir, o equipo de Echegoyen e Barceló baixou dous postos, rematando a regata en sexta posición, penalizando ata 12 puntos.
Nesta carreira, as españolas foron superiores ás neerlandesas, pero estas lograron afianzar o bronce pola mínima.
Esta é a segunda vez que Támara Echegoyen remata cuarta nuns Xogos Olímpicos. Xa o fixera en Río 2016, quedando tamén a piques de meterse no podio. Si conseguira subir no 2012, en Londres, cando obtivera o ouro no Elliott 6m xunto a Sofía Toro e Ángela Pumariega. Desta vez, a ourensá volve a casa con diploma.
