O dúo formado pola ourensá Támara Echegoyen e Paula Barceló no 49er FX de vela está nun gran momento antes das regatas decisivas. Este venres disputaron as regatas 7, 8 e 9, e cos seus resultados ascenden á segunda posición da táboa xeral.
Tal e como recolle a Real Federación Española de Vela, a propia regatista galega recorda que “queda moita pelexa e sabemos o boas que son as nosas adversarias”.
Un paso máis preto da final para Echegoyen e Barceló
A xornada foi de menos a máis. Na primeira manga, as regatistas remataron na 13ª posición, a 3:06 de distancia da parella gañadora, a formada polas brasileiras Grael e Kunze.
Na seguinte proba da tarde toquiota, as españolas melloraron a súa posición quedando cuartas, a un punto do podio e a catro do ouro. Nesta carreira, as vencedoras foron as arxentinas Travascio e Branz, cun tempo 0:49 mellor que Echegoyen e Barceló.
Na última competición da xornada, a novena regata olímpica, as españolas remataron quintas, a 2:07 das polacas Melzacka e Loboda.
Con estes resultados, o equipo da ourensá e a balear colócase segundo na clasificación xeral, só un punto por detrás das holandesas Bekkering e Duetz.
Último esforzo previo á Medal Race
O sábado, 31 de xullo, desde as 05:05 hora española disputaranse as últimas regatas previas á final. Támara Echegoyen e Paula Barceló competirán nas carreiras 10, 11 e 12, en busca dun posto na loita polas medallas olímpicas.
