O Maristas Coruña ve peligrar as súas opcións de permanecer na categoría de prata, pero aínda queda tempada por diante. O seguinte reto para lograr o obxectivo: gañar ao Azkoitia Azpeitia ISB, terceiro clasificado. A cita será este domingo, 7 de febreiro, ás 11:00 horas.
A falta de sete xornadas, e os partidos adiados que teñen outros clubs, o Maristas ocupa a undécima posición, con 23 puntos, a catro do colista, e tamén a catro do sétimo clasificado.
Aínda quedan puntos en xogo na LF2 para afianzar a permanencia, pero a Liga está moi competida. Cada partido é unha oportunidade de ouro para achegarse á meta e as coruñesas xa xogaron coa maior parte dos seus rivais directos.
Entre eles, o equipo de Carreira xa sumou dúas vitorias ante as galegas da AD Cortegada e Ulla Oil Rosalía, pero unha derrota co Arxil. Nas próximas semanas enfrontaranse a Magec e ADBA.
Un rival forte para o Maristas Coruña
Pero antes diso, o Maristas debe centrarse no Azkoitia e traballar pola vitoria. As contrincantes desta 19ª xornadas son un óso duro de roer, xa que só caeron en cinco ocasións en 18 partidos.
Unha delas foi na última fin de semana, ante o BAXI Ferrol. As universitarias frearon de cheo o progreso das vascas, que viñan dunha racha de cinco vitorias consecutivas.
Baloncestistas como Desiree Primm destacaron neste último encontro, sendo a segunda mellor valorada da cita e máxima anotadora do seu club.
Nas súas filas está tamén a segunda xogadora con máis puntos anotados da competición e unha das mellor valoradas, Morgan Green.
As vascas gañaron a ida
Atendendo ao último duelo entre galegas e vascas, celebrado en novembro na Coruña, o Azkoitia ten as de gañar. Naquela sexta xornada, as entón visitantes dominaron a primeira parte, o que deixou sen tempo de reacción ao Maristas.
Este foi un partido do que as pupilas de Carrera deben tomar nota de cara ao novo enfrontamento. Hai máis distancia na táboa con respecto ao nivel que ambos equipos deixaron ver sobre a pista na primeira volta. Por este motivo, as galegas deben apostar desde o minuto un e dalo todo para facerse co trunfo.
