Perder co STV Roldán FSF na súa casa, entraba dentro dos cálculos das herculinas do Viaxes Amarelle FSF. Pero facelo por 5-0 foi un castigo excesivo para as xogadoras que adestra Jorge Basanta que se atoparon fronte a fronte cun efectivo Roldán que deu renda solta á sua faceta goleadora na segunda metade.
O Viaxes Amarelle FSF afrontaba un duelo complicado despois dunha viaxe moi longa a Murcia. As galegas empezaban con bo nivel o partido, pero con falta de acerto a gol. Até o descanso o enfrontamento estaba aberto cunha vantaxe mínima das locais por 1-0. Xa na segunda metade, o STV Roldán FSF aproveitaba as súas ocasións para porse cun 3-0 no marcador. Cando nese punto as galegas optaron polo xogo de cinco non atoparon o beneficio desexado. As galegas chegaron con moito perigo nos primeiros minutos, pero logo o cansazo minou ás herculinas que acababan caendo derrotadas por un marcador de 5-0.
Ambos os dous equipos tiñan claro o seu rol
O partido empezaba con dous equipos moi metidos no partido desde o primeiro momento, e ambos coas ideas moi claras. Mentres que o conxunto local optaba por levar o control do partido, o conxunto galego apostaba por esperar a media cancha con intensidade e tratar de sorprender á contra.
Nos seus primeiros minutos o cruce tornouse nun pequeno correrúas con ocasións para ambos en equipos en portaría contraria, pero con boas actuacións por parte de ambas as dúas porteiras.
Os minutos pasaban e o xogo igualábase na cancha, do mesmo xeito que as ocasións. Con todo, o gol non subía ao luminoso para ningún dos dous equipos.
Xa no tramo final da primeira metade, os minutos acumulados empezaban pesar nas pernas das galegas. Foi entón cando nunha saída de balón, as locais roubaban en primeira liña e artellaban unha rápida contra. A ocasión foi finalizada por Consuelo Campoy no segundo pau cun potente disparo desde dentro da área que puña o 1-0 no marcador.
Tras este gol das locais, o STV Roldán FSF pareceu pór unha marcha máis e puxo en serio perigo a portaría galega, pero finalmente o marcador mantívose no 1-0 até chegar ao tempo de descanso.
Na segunda metade o partido seguía cunha actuación moi medida de ambos os equipos, cun STV Roldán que quería seguir levando o ritmo do xogo, mentres que as herculinas seguían optando por tentar sorprender, aínda que sen fortuna.
Pouco antes da medianía do segundo tempo, Ángela Gorriz puña o 2-0 no marcador ao finalizar unha xogada no segundo pau, tras algunha das ocasións máis perigosas para que o Viaxes Amarelle FSF igualase o partido. E cando apenas pasaran uns segundos, o STV Roldan anotaba o 3-0 cun disparo cruzado de Cristi Sánchez.
Xogo de cinco do Amarelle nos últimos 12 minutos de xogo
Restaban 12 minutos por diante, e o Viaxes Amarelle FSF optaba por saír co xogo de cinco e facíao nos primeiros ataques con moito perigo sobre a portaría murciana. Pero a falta de sete minutos para o final, Alba Gandía conseguía finalizar un ataque e subía o 4-0 ao marcador tras aproveitar unha perda de balón das galegas na saída desde atrás.
O partido xa se facía pesado, e o resultado era moi adverso, pero a pesar diso o conxunto galego seguía pelexando coa opción de porteira xogadora, aínda que con menos ocasións que nos primeiros minutos.
Cando xa todo parecía sentenciado, chegaba o 5-0, dos pés de Marta de los Riscos, cando quedaban tres segundos para o final do tempo regulamentario.
Foi un partido moi competido e serio do cadro herculino, que recibiu un duro castigo do seu rival tras un partido cheo de loita. As locais aproveitaron mellor a súa efectividade de cara á portaría contaría.
As herculinas seguen penalizando moito a súa falta de acerto, e máis nun enfrontamento como este onde as galegas contaron con varias ocasións moi boas para poder meterse no partido.
O seguinte rival, o Teldeportivo que vén de gañar ao Cidade
Tras a disputa deste novo encontro da competición regular, o Viaxes Amarelle FSF regresará o luns aos adestramentos. Na mente das coruñesas, preparar un duelo dos importantes na tempada contra un rival directo na Primeira División Nacional Feminina de fútbol sala. O cadro herculino disputará a 16ª xornada do SubGrupo A, o sábado 27 de febreiro de 2021 ás 15:30 horas no Centro Insular de Deportes (Las Palmas Gran Canaria) visitando ao Gran Canaria FSF Teldeportivo, que esta xornada gañaba por primeira vez neste curso e o facía contra o Cidade de As Burgas en Ourense (2-4).
FICHA TÉCNICA
STV ROLDAN FSF: Almudena, Noelia Montoro, Marta Pelegrín, Lola, Ángela (cinco inicial), Alba, Consuelo Campoy, Andrea, Cristi Sánchez, Riscos.
VIAXES AMARELLE FSF: Leti Rojo, Laura Doce, Cris Lourés, María Gómez, Anna Escribano (cinco inicial), Patri Corral, Candela Soria, Yaiza, Sofía, Sandra Rodríguez.
GOLES: 1-0 Consuelo Campoy (min. 16); 2-0 Ángela Górriz (min. 27); 3-0 Cristi Sánchez (min. 28); 4-0 Alba Gandía (min. 33); 5-0 Marta de los Riscos (min.40).
ÁRBITROS: Hidalgo Marín y Martínez Martínez del Colegio de Árbitros de Murcia. Sancionaron con cartón amarelo a Noelia Montoro del STV Roldán FSF, así como a Patri Corral e Lau Doce do Viaxes Amarelle FSF.
INCIDENCIAS: Partido correspondente á 15ª xornada do SubGrupo A da Primeira División Nacional Feminina de Fútbol Sala da RFEF disputado no pavillón Municipal Gabriel Pérez Sánchez no concello murciano de Roldán.
