Dous partidos gañados e dous perdidos son a traxectoria dun Durán Maquinaria Ensino que non coñece a vitoria lonxe de Lugo. As galegas queren tirar proveito da serie que leva o Tenerife (con dous partidos perdidos de xeito consecutivo) para acadar o seu primeiro triunfo fóra da casa. Para colmo, as canarias non gañaron aínda ante o seu público, así que serán un rival duro e con moita ansia por dar unha alegría á súa afección.
O Durán Maquinaria Ensino visita a cancha do Tenerife. O partido, correspondente á quinta xornada da Liga Femenina Endesa, está fixado para as 21:00 horas (horario peninsular) no Pabellón de los Deportes Santiago Martín de San Cristóbal de La Laguna (Santa Cruz de Tenerife). Arbitrarán o choque os o equipo arbitral composto por Carlos Javier García León, Elena Espinau Guarner e Daniel Cervantes Fernández.
Logo de dúas derrotas consecutivas, o club que adestra Claudio García buscará acadar un punto de inflexión na súa traxectoria. As galegas que prepara Antonio Pernas non teñen pensado poñérllelo doado.
O Durán Maquinaria Ensino empezaba a competición na Liga Femenina Endesa 2022-23 caendo derrotado a domicilio ante o Casademont Zaragoza (68-63). Na segunda xornada da competición ligueira, xa no Pazo, as galegas que adestra Antonio Pernas gañaban, ao Perfumerías Avenida por 62-55 arrasando no último cuarto.
O Durán Maquinaria Ensino non gañou aínda fóra de casa
Unha de cal e outra de area. As lucenses volvían perder na terceira xornada. De novo fóra da casa, esta vez contra o Spart Girona 75-54. En Lugo o Durán Maquinaria Ensino ten feito do Pazo dos Deportes un fortín. Na cuarta xornada volvía gañar. O rival, desta volta foi o Hozono Global Jairis e o tanteo 56-55. So un arriba pero abondo para que o triunfo quede na casa.
Xusto ao revés que as galegas, as tinerfeñas o que non coñecen é o sabor da vitoria en casa. O público do Santiago Martín desexa ver ao seu equipo gañar, pero o equipo que adestra Claudio García non foi aínda quen de darlle unha alegría nese sentido á súa afección.
Na primeira xornada o Tenerife caía 57-69 ante o Movistar Estudiantes. Na segunda vencía a domicilio ao IDK Euskotren (62-68). Na terceira xornada outra vez perdía na casa, nesa ocasión contra o Innova – TSN Leganés (63-66). E na última xornada perdía fóra na cancha do Casademont Zaragoza (68-50). Son un rival forte e con moita ansia por gañar e, sobre todo, facelo ante as súas seareiras.
Neste momento, con catro xornadas disputadas, o Tenerife e penúltimo na clasificación da Liga Femenina Endesa, e o Durán Maquinaria Ensino ocupa a 12ª posición cun partido máis gañado cas canarias.
Antonio Pernas: “O Tenerife terá as mesmas urxencias que nós, mesmo máis”
