Co remate da tempada 2021-2022, o Durán Maquinaria Ensino logrou afianzar a súa posición na máxima categoría do baloncesto español, pero outros obxectivos, como disputar a Copa e o playoff quedaron sen cumprir despois dun curso marcado polas lesións.
O presidente do club, Manuel Durán, falou en rolda de prensa este mércores para facer un balance do ano. En liñas xerais, admitiu que “a avaliación é moi moi positiva tendo en conta os medios que temos e como o estamos facendo”.
Durante a súa intervención, o mandatario destacou o labor do plantel, así como os esforzos do técnico Ferán Varela, sen esquecer o traballo aportado previamente no banco por Miguel Ángel Ortega. Da mesma forma, incidiu na falta de apoios por parte das entidades e institucións para que o proxecto do Ensino se manteña nunha competición que ano tras ano sube de nivel e que está cada vez máis profesionalizada.
Baremo positivo malia quedar fóra de Europa e da zona alta da LF Endesa
Manuel Durán recoñeceu durante os primeiros minutos da súa intervención que “cando se fixo o plantexamento era moi ambicioso por ir a Europa, que era algo descoñecido para o club e a cidade e para nós como entidade, pero é certo que fai falta algo máis”.
O presidente recalcou como os equipos que compiten a nivel continental son os máis fortes, e que a actuación do Ensino “estivo moi ben. A clasificación aquí foi perfecta co equipo italiano, na fase fumos baixo mínimos, tiñamos o nivel, pero como todo, saiu regular desde o principio polas lesións”.
As baixas marcaron a tempada das lucenses, que non puideron contar co plantel ao completo en momentos decisivos. Con todo, isto non é excusa para o club: “Non podemos falar sempre do mesmo, outros equipos tamén tiveron lesións. Onte escoitaba a Lino (adestrador do BAXI Ferrol) en rolda de prensa e chapó, tamén elas tiveron problemas e tiveron a mala sorte de descender despois de facer unha tempada realmente boa“.
“O noso obxectivo era a Copa e ir a playoff. Tiñamos equipo para elo e non o conseguimos. Conseguimos unha salvación temperá e con este plantel tiñamos que conseguila. Hai que recoñecer o labor de Fernán que cambiou o chip e a dinámica de equipo e conseguiu convencelas e sacar ao equipo adiante. Non temíamos o descenso, pero estaba aí. O baloncesto é así“, seguiu Durán.
Coa tempada rematada na décima posición, o presidente do Ensino considera que o resultado final “non é unha catástrofe, é un exito tendo en conta o apoio que temos. Este equipo basease na xente que traballa nel e nas xogadoras, porque axuda externa temos pouca”.
Ademais, nas últimas xornadas, a sorte comezaba a sorrir ao equipo, que podía desfrutar de cada vez máis xogadoras no parqué. “Estaban on fire. Temos que ter en conta que estaban reventadas porque foi unha tempada longa, pero estaban moi contentas. Como estabamos vendo ultimamente, son xogadoras que están facendo as súas mellores tempadas aquí”, engadiu.
Falta de referente
Na pretempada, o Ensino anunciou a fichaxe da internacional Tamara Abalde, unha xogadora que prometía ser peza clave nos plans lucenses. Con todo, unha lesión truncou a súa actuación durante a campaña, quedando relegada a un papel non menos importante dentro do vestiario.
Malia non podes dispoñer dela na pista, o club apostou por mantela no plantel. “Era a nosa fichaxe estrela e a o club portouse de 20 porque isto probablemente noutro club non tería sido da mesma maneira”, apuntou o presidente.
Tamén insistiu en que “fóra do que é o tema deportivo axudou moito. É unha moza con moita experiencia e no plantel e no vestiario tivo un peso á hora de que isto mellorase. Iso téñoo clarísimo. Agora para que recupere ao 100% se é que se recupera vai levarlle tempo e o tempo pasa. É unha mágoa porque contabamos con ela e era un dos nosos referentes. Se a tiveramos desde o inicio ao mellor as cousas serían diferentes. Non nos imos queixar de todo, porque entón todo son disculpas. Tiñamos plantel para máis pero estas foron as circunstancias”, explicou.
O cambio de Ortega a Varela
Un dos momentos máis relevantes da tempada en Lugo foi o cambio de adestrador. Coa marcha de Miguel Ángel Ortega, Fernán Varela pasou a asumir o liderato do banco galego. Sobre o primeiro adestrador, Manuel Durán confirmou que xa está “desvinculado” da entidade e que “tiña un proxecto bonito e ambicioso e non funcionou. Non sabería dicir por que, non hai máis que ver o cambio de actitude das xogadoras”.
O cambio coincidiu coa recuperación de varias das xogadoras, pero o presidente resaltou que “desde que está Fernán melloramos. Ao final é destas cousas que cambiar a un adestrador é complicado, hai un tema económico e o compromiso que adquires e a mitade de tempada cambiar é duro” confesa. A isto engade que “crimos que era o mellor para o club e saiu ben. Podía saír mal e saíu ben. Era un cúmulo de mala sorte e non podemos botar a culpa a Ortega de nada“.
O Ensino precisa apoios para facer fronte á vindeira tempada
