O Maristas Coruña non levanta cabeza e sufriu a cuarta derrota consecutiva ante o GDKO Ibaizabal por un abultado 78-45. Esta é a oitava das coruñesas nesta tempada de Liga Feminina 2, o que as deixa na undécima posición con 14 puntos, a tres do colista.
Despois dunha dura derrota contra o BAXI Ferrol, recibindo máis de cen puntos, as galegas querían cambiar o chip ante as vascas pero non o conseguiron. Unha semana máis, e van catro, son o equipo que menos anota da xornada.
Un Maristas sen acerto
Jorge Carreira non atopa a clave para que o seu equipo compita nos partidos. A entrada de Laura Martínez no quinteto inicial non cambiou moito o xogo visitante, que non soubo frear ás locais.
O comezo do encontro xa deixou claro que o GDKO Ibaizabal sería superior, adiantándose as locais con facilidade no marcador e logrando marcar máis do dobre de puntos que o Maristas para a fin do primeiro cuarto.
No segundo, a tónica seguiu a ser a mesma, e a distancia entre ambos equipos no electrónico seguía aumentando. Un duro 23-10 sentenciaba o 51-21 para o descanso.
A remontada semellaba case imposible, e o GDKO xogaba cómodo na súa casa distanciándose cada vez máis. O maior acerto desde a liña de tiro libre, a de tres e desde todo o campo guiou ás vascas cara a vitoria. A falta de dez minutos, a diferenza era de 36 puntos.
O cadro coruñés só reaccionou no último tempo, cando por fin logrou levarse un cuarto, que non serviu de nada. Cun 12-15 para rematar o partido, a pequena vantaxe de dous puntos non achegou ás galegas ao empate e os dous puntos quedaron en Vizcaia.
O partido de Tulonen
A xogadora do GDKO Ibaizabal Kristina Tulonen, ex do Celta Zorka Recalvi, foi a MVP do partido con 30 créditos valorativos. Igualando así, a todo o conxunto rival, que entre as dez xogadoras tamén sumou 30 puntos.
Por parte do Maristas, Eugenia Filgueira foi a máxima anotadora, con 11 puntos e empatando a 10 créditos de valoración coa súa compañeira Laura Cervelo.
FICHA TÉCNICA
78) GDKO IBAIZABAL: Laura Marcos (4), Juana Molina (10), Kristina Tulonen (25), Elina Koskimies (3), Rebeca Cotano (9)– quinteto inicial -. Tamén xogaron: Laura Arroyo (3), Michele Ferris (14), Paule Portilla (6), Ane Arrien (-), Ana Iruskieta (-), Maiane Aizpurua (4) e Julene Royale (-).
45) MARISTAS CORUÑA: Laura Martínez (9), Tatiana Casal (1), Eugenia Filgueira (11) Andrea Pérez (6), e Laura Cervelo (4) – quinteto inicial -. Tamén xogaron: Joana Pereira (5), Mara Cortés (1), Marina Feijoo (-), Laura Hughes (8) e Adriadna González (-).
PARCIAIS: 28-11, 23-10, 15-9 e 12-15.
ÁRBITROS: Gorka García e Pablo Mirantes.
INCIDENCIAS: Partido correspondente á xornada 12 da LF2, disputado no polideportivo de Urreta en Galdakao (Vizcaia).
