O equipo herculino do Viaxes Amarelle FSF, dirixido por Jorge Basanta, termina a xornada un pouco máis líder do Grupo 1 da Segunda División do Fútbol Sala Feminino da RFEF tras conseguir unha importante vitoria fronte ao Bembrive FSF. Un cruce entre equipos galegos ubicados na zona alta que fortaleceu ás coruñesas nesa zona nobre da clasificación.
A pesar de empezar por detrás no marcador, as herculinas foron capaces de rearmarse sobre a cancha, dar a volta ao marcador e conseguir o tres puntos, ao imporse por un marcador de 6-3, grazas aos goles de Candela Soria (2), Èlia Gullí, Patri Romaní (2) e un en propia porta.
O partido empezaba cun Viaxes Amarelle FSF que quería levar o peso do partido e o xogo, mentres que o Bembrive FSF optaba por esperar en media cancha e tratar de sorprender á contra. As herculinas xerarían as súas primeiras ocasións, pero o gol non chegaba; mentres que as visitantes conseguían adiantarse ao sete minutos de xogo, cando Lucía roubaba un balón nunha saída local, e tocaba o balón con Laura Centeno que puña por diante ao Bembrive FSF, co 0-1 no marcador.
Aínda partira por diante, pero as herculinas nunca dan un partido por perdido. O conxunto adestrado por Jorge Basanta seguiu coa súa tranquilidade e xogo sobre a cancha, ata que conseguiron igualar a contenda pouco antes da medianía do primeiro tempo, cun disparo cruzado e exterior de Candela Soria.
Tras a igualada, o Viaxes Amarelle FSF seguía coa presión alta de balón e conseguía un saque de esquina que Èlia Gullí executou un disparo exterior de dez metros. O esférico se lle escapaba das mans á meta visitante, e subía o 2-1 ao marcador.
As herculinas seguían envorcadas en ataque, e un par de minutos máis tarde chegaba o 3-1, tras unha longa xogada elaborada do cadro herculino, que finalizaba Patri Romaní no segundo pau, a pase de Cris Lourés.
As locais tomaban vantaxe no partido, tras dar a volta ao primeiro gol visitante, e seguía buscando ampliar a renda, pero faltaba a definición para ampliar a renda. A falta de pouco máis dun minuto para o final do primeiro tempo, Claudia conseguía recortar distancias para o Bembrive FSF, pondo o 3-2 cun disparo frontal exterior, moi axustado ao pau da portaría local.
Logo do paso por vestiarios, o conxunto visitante saía moi metida polo partido e mostrábase nos seus mellores momentos do partido, e víanse con intención de dar a sorpresa no Municipal de Sagrada Familia. De feito cando apenas pasaran minuto e medio de partido chegaba unha xogada polémica onde Bembrive FSF puña o 3-3 no marcador, pero os colexiados pitaban falta sobre Leti Rojo, e as herculinas seguían mantendo a vantaxe no marcador.
Este aviso, púxolles as pilas ás herculinas, que viron que o rival estaba preto de pór perigo o partido. Armáronse en ataque para poder ampliar distancias no marcador, e xogar o partido con máis calma. Co todo, o Bembrive FSF non daba o partido por perdido en ningún momento.
Na medianía do segundo período, María Gómez apuraba unha xogada ao bordo da liña de fondo, pondo un centro na área pequena, que tocaba en Lucía Osorio e o balón íase ao fondo da rede, cun marcador de 4-2 para as coruñesas.
Aínda quedaba moito partido por diante, e o Bembrive FSF non se daba por vencido no partido, e seguía buscando recortar distancias. As visitantes apostaron incluso polo xogo de cinco cando restaban catro minutos por disputarse. No saiu ben o plan deseñado polo técnico das viguesas, Pitu. O gol chegaría para o Viaxes Amarelle FSF a pouco máis de dous minutos para o final, cando Patri Romaní finalizaba no segundo pau, unha contra fulgurante, que ela mesma iniciaba cun roubo de balón en cancha propia, e saída nun 3 para 1 sobre o Bembrive FSF.
O conxunto visitante seguiu apostando polo xogo de cinco á procura de recurtar distancias no marcador, e a falta dun minuto para o final do tempo regulamentario, conseguía subir o 5-3 ao marcador, nun tanto transformado por Eva.
O Viaxes Amarelle FSF apenas tardou 12 segundos en dar a réplica, cando Candela Soria subía o 6-3 ao marcador, resultado que ao cabo resultaría definitivo para dar tres puntos de ouro ao conxunto herculino.
O Viaxes Amarelle xoga Copa co Marín Futsal o mércores
Tras este novo partido oficial da tempada, o equipo volverá o martes ás xornadas de adestramento para preparar o seguinte choque. Desta volta será un compromiso da Copa de S.M. A Raíña, que terá lugar este mesmo mércores 8 de decembro no Pavillón Municipal da Sagrada Familia da Coruña a partir das 12:00 horas. O rival será outro equipo galego da Primeira División, o Marín Futsal que está facendo unha brillante tempada no seu debut na elite.
FICHA TÉCNICA
6) VIAXES AMARELLE FSF: Leti Rojo, Cris Lourés, Patri Romaní, Èlia Gullí e Candela Soria – quinteto inicial -. Tamén xogaron: Lau Doce, Yaiza e María Gómez.
3) BEMBRIVE FSF: Marina, Lucía, Laura, María e Paulinha – quinteto inicial -. Tamén xogaron: Claudia, Lutxi, Lucía Osorio e Eva.
GOLES: 0-1 Laura (min. 7); 1-1 Candela Soria (min. 9); 2-1 Èlia Gullí (min. 10); 3-1 Patri Romaní (min. 12); 3-2 Claudia (min. 19); 4-2 Lucía Osorio (propia porta) (min. 30); 5-2 Patri Romaní (min. 37); 5-3 Eva (min. 39); 6-3 Candela Soria (min. 39).
ÁRBITROS: José Manuel Carreira Romero e Marcos Vázquez Mayán do Comité Técnico de Árbitros da Coruña e Pontevedra. Mesa: Lucía Manso Porteiro do Comité Técnico de Árbitros da Coruña. Amonestaron con cartón a Candela Soria, Èlia Gullí e Jorge Basanta pola parte do Viaxes Amarelle FSF, e a Claudia e Eva do Bembrive FSF, en todos os casos a sanción foi cartón amarelo.
INCIDENCIAS: Partido correspondente á oitava xornada de liga no Grupo 1 da Segunda División Feminina de Fútbol Sala da RFEF disputado no Pavillón Municipal da Sagrada Familia na cidade da Coruña.
