A segunda fase, previa aos play-off polo título, comezará con acento galego. Ourense Envialia e Pescados Rubén Burela, citaranse na pista das primeiras, Os Remedios, este sábado, ás 17:00 horas.
“Estabamos desexando ter un derbi; non é un partido sen máis, sempre hai unha presión, unha motivación e un sentimento especial. Tiñamos moitas ganas de gozar dun partido así”, declara a 17 mariñá, Ale de Paz, sobre o duelo galego.
Despois de disputar o amigable en pretempada en San Cibrao, cun 6-1 final a favor do Burela, ourensás e lucenses reencontranse na segunda fase. Para a xogadora laranxa, este será un partido moi distinto ao do pretempada.
Ale de Paz (Burela): “O Ourense ten un cadro de moita calidade, pero tamén tiveron baixas importantes”
Nas palabras da á – peche, “o Ourense ten un cadro de moita calidade, pero tamén tiveron baixas importantes durante a tempada: Andrea Feijoo, Sara Moreno -que xa se está metendo outra vez co equipo- e agora a de Marta Figueiredo. A pesar diso, ten un cadro moi completo para rascar algo. Nós imos ir na nosa liña, dispostas a non ceder nada e gañar”, declara.
No Pescados Rubén Burela, o adestrador Julio Delgado non poderá estar presente no partido galego, xa que deberá cumprir o primeiro partido de sanción tras o encontro co Móstoles FSF. Dentro da súa convocatoria competirán:
- 1. Jozi
- 3. Dany
- 4. Sandra Buzón
- 7. Peque
- 8. Cami
- 10. Lara Balseiro
- 11. Jane
- 12. Luísa Mayara
- 14. Bea Mateos
- 17. Ale de Paz
- 19. Elena Aragón
- 21. M. Cortés
O partido retransmitirase vía streaming no Youtube do Concello.
Así chegan Envialia e Burela á segunda fase
Para esta segunda fase da Primeira División, as Guerreiras Laranxas parten como líderes do seu grupo inicial e segundas novo grupo C, por detrás do Futsi Atlético. O Burela acumula 39 puntos e un coeficiente do 2,6.
Pola súa parte, as de Morenín salvaron a cuarta posición no seu grupo da primeira parte e para a segunda fase chegan como as peor clasificadas, con 26 puntos e un coeficiente do 1,62.
Duelo galego antesala á final da Copa Galicia
Ourensás e lucenses teñen outra cita máis marcada no calendario. Ambos conxuntos disputarán en Narón o título da Copa Galicia, tras o pase á final do Envialia que venceu ao Poio Pescamar.
Estes dous equipos citáronse o pasado martes para disputar a semifinal, 13 meses despois de xogar a ida, xa que a volta tivo que ser adiada en tres ocasións. Cun 4-1, as de Gonzalo Iglesias Morenín gañaron o billete á final.
