A volta do futsal feminino de máximo nivel trae un duelo galego para comezar o ano. Viaxes Amarelle e Ourense Envialia enfrontaranse na reanudación da Primeira División, xogando o sábado, 16 de xaneiro, ás 18:30 horas en terras coruñesas. O partido será televisado na TVG2 e xogarase a porta pechada por mor da situación da pandemia de COVID-19 na cidade da Coruña.
Non pasou moito tempo desde a última vez que estes dous equipos se viron as caras. Hai cousa dun mes, as galegas recuperaban o encontro adiado da primeira xornada. Daquela, os puntos quedaron en Ourense, sumándose ao casilleiro do Envialia.
O partido, que entón disputouse no Paco Paz, estivo moi igualado, no que ambos competiron alternando a presión a media cancha e a presión a tres cuartos. Finalmente, o acerto local da man de Judith Pedreira e Jenny Lores decantou o encontro para as de Morenín.
Obxectivos distintos, pero que pasan pola vitoria
Para esta nova edición do derbi galego, as herculinas intentarán darlle a volta ao marcador para escapar dos postos de descenso, sobre os que periga. A dous puntos do Cidade de As Burgas e cinco do Teldeportivo, as coruñesas están estancadas na parte baixa da clasificación.
Unha situación distinta á que está a vivir o Envialia. De gañar este partido, como xa fixera na ida, os tres puntos serviríanlles para recortar distancias coas primeiras clasificadas. Actualmente, o líder, o Futsi Atlético, está a 10 puntos, o Poio a sete, o Roldán a cinco e empatan en puntos co cuarto clasificado, o Leganés.
Martita, do Amarelle, segue de baixa
Nas filas herculinas seguirá faltando unha xogadora importante. Martita, que se lesionou precisamente no duelo contra as ourensás, segue de baixa sen coñecer aínda a data para a súa volta ás pistas.
A porta pechada pola situación da pandemia de COVID-19
Debido ás restricións vixentes na cidade da Coruña, así como o estado de alarma e o incremento de casos positivos de COVID-19 en toda España, desde o club herculino comunican que o partido non terá público. Segun explican desde o Viaxes Amarelle: “O club ten dedicido que este encontro se dispute a porta pechada coa fin de sermos responsables”.
A entidade herculina explica que é coñecedora “das ganas que a afección ten de poder acudir ás instalacións deportivas, pero nestes momentos non é seguro, nin satisfactorio para as persoas usuarias permitir o acceso de público xa que existen unhas limitacións moi severas e A Coruña ten activado o peche perimetral”.
Así, este duelo de rivalidade entre equipos galegos non poderá seguirse en vivo no recinto pero si a través da TVG2. A canle autonómica transmitirá o partido á súa audiencia.
📽💪⚽️ A POR LA SEGUNDA VUELTA ‼️
El equipo dirigido por @JorgeGBasanta inicia la segunda vuelta con un #derbiGallego en la #PrimeraRFEFfutsal
⚽️ @amarellefsf – @OUenvialiaFSF
🗓 Sábado 16/01/2021
⏰ 18:30 h
📺 Directo en TVG2#FutsalFemenino #jornada10 #vamosNaranjas pic.twitter.com/FpkQ4ZetSJ— Viaxes Amarelle FSF (@amarellefsf) January 13, 2021
