Despois de catro xornadas, o balance do Celta Zorka Recalvi na nova LF Challenge é positivo. As celestes comezaron sufrindo unha derrota na xornada 1 e outra na 2, pero desde entón as viguesas teñen ritmo de vitoria. Tanto na terceira xornada como na cuarta as galegas sumaron dous puntos.
Desta forma, cun total de seis puntos, o Celta marcha oitavo na que actualmente é a segunda división do baloncesto español, na cola da metade superiorda táboa, e empatado con equipos como o Osés Construción Ardoi, o Manuela Fundación Raca e o CAB Estepona Jardín Costa Sol.
“Temos que seguir nesta liña e que o equipo se deixe cada día o pel na pista”, declarou a adestradora Cristina Cantero tras o último encontro.
Triunfo a domicilio contra o Raca
Despois de perder ante o NB Paterna por un 66-61 na primeira xornada, e repetir derrota na seguinte fin de semana, desta vez por un 58-64 ante o Hierros Díaz Extremadura Miralvalle.
Para a primeira vitoria habería que agardar á terceira xornada, na que as celestes viaxaron para xogar contra o Manuela Fundación Raca. Este foi un partido disputado, no que o triunfo puido caer para calquera bando, e as viguesas fixéronse cos dous puntos nos últimos minutos.
Nos primeiros minutos, as locais dominaban na súa pista, acadando unha importante vantaxe pasado o ecuador do primeiro cuarto (15-7). Coa entrada de Maggie Mulligan, as celestes recuperaron o control, recortando distancias cos tiros libres da estadounidense (16-13).
No segundo cuarto, o xogo vigués non facía máis que mellorar. Cunha defensa máis agresiva, as de Cantero seguían preto das locais, impedindo que se fóran no marcador. Cando no electrónico estaba o 25-19, Fequiere entrou en escea para liderar ás celestes, que fixeron un parcial 0-11 para tomar a iniciativa. Antes do descanso, Andrea Alcántara tiña que deixar a pista aparentemente mancada, tras caer nun retroceso defensivo.
Despois do paso por vestiarios, cun 30-33 a favor, o Celta saltou ao terreo de xogo motivado para afianzar a vitoria momentánea. Fequiere e Mulligan seguían mantendo activo o equipo das viguesas, sen fallar baixo o aro. Porén, o Raca comezou a mellorar o movemento de balón, e con varios triplos de Boquete, volveron colocarse por enriba. Malia a desvantaxe, as celestes non baixaron o ritmo e o útlimo cuarto chegou cun 51-48.
Nos últimos dez minutos, as granadinas aumentaron a súa distancia a seis puntos. As galegas melloraron a súa defensa, sen conceder transicións fáciles, e asinando un parcial 0-9, colocando de novo ás olívicas por diante.
A falta só de 40 segundos, as visitantes vencían dun punto, con o resultado completamente aberto. O ataque celeste saldouse cun rebote ofensivo, pero o balón tiña problemas para entrar no aro. O Celta confiou na súa defensa para selar a vitoria, e cun punto de Davydova venceron por un 61-63.
Primeira vitoria en Navia
Este martes, o Celta volvía a Navia e logrou brindarlle ás 300 persoas presentes no pavillón celeste unha importante vitoria. As viguesas dominaron o encontro ante o extremeño Al-Qázeres, marcando o guion do partido.
As de Cristina Cantero sairon con moita enerxía ao duelo, asinando un parcial 15-4 en cuestión de catro minutos. O técnico rival tivo que parar o reloxo para reaxustar ás súas xogadoras, pero o equipo vigués seguía enchufado, e rematou o primeiro cuarto anotando cinco de oito triplos. Cun triplo sobre a bocina, as cacereñas achegábanse, pero cun 28-13 no marcador.
No segundo parcial, o encontro converteuse nun intercambio de golpes entre ambos conxuntos, pero o Celta mantíñase por diante. Coa entrada de Sara Zaragoza no equipo visitante, estas puideron recortar distancias, pero as locais afianzaron a súa vantaxe ao descanso (47-36).
No terceiro cuarto, o Al-Qázeres achegábase perigosamente, pero as de Cantero responderon cun parcial 10-0 con dous triplos exteriores e dúas canastras de longa distancia das súas pivotes. O equipo celeste ofrecía un espectáculo á súa afección, mantendo sempre a dianteira.
Nos últimos minutos, Mariona Martín liderou o ataque vigués co seu cuarto triplo inmaculado e repartiu unha asistencia para devolver a tranquilidade ante a ameaza visitante. De novo, o Celta vencía por 20 puntos, e nin un parcial 0-9 das cacereñas serviu para poñer en perigo a vitoria galega. O duelo remataría co 77-65 final.
As sensacións de Cantero tras dúas vitorias
Á fin deste último encontro, a adestradora Cristina Cantero asegurou que “estivemos no partido serias”, pero apuntou que “daba a sensación de que o tivemos que gañar varias veces. Íamos a 18, 20 e metíanse a dez e iso o equipo o ten que mellorar. En xeral saimos moi intensas, sabendo o que queriamos facer, trastocáronnos as rotacións e o plan de traballo con Laia tocada, non parece nada grave, pero coxeaba molesta”.
No plano individual destacou a Maiona e resumiu a vitoria en boas sensacións: “Moi contenta de sacar a primeira en casa, de ir medrando. Ao final este vai ser un camiño moi longo e temos que ir medrando en cada partido, competindo e aproveitando as oportunidades”.
Cantero: “Ao final este vai ser un camiño moi longo e temos que ir medrando en cada partido, competindo e aproveitando as oportunidades”
Cantero ten claro que aínda queda camiño na LF Challenge e estes dous triunfos son “un subidón de máis enerxía”. A isto engadiu que aínda “temos que incorporar a Maggie, de todo, de físico, de incorporación ao equipo, hai moitos adestramentos, viaxes…”, pero asegura que “todo iso vai rápido e o equipo está traballando moi ben”.
🎥 Primera victoria en Navia y declaraciones de @Canteroostos
✅ Gentileza de @GrupoCdeC@uvigo #xacobeo2122 #LFChallenge #postpartido#CeltaAlQazeres pic.twitter.com/IqKQcpBjhL
— CELTA BALONCESTO 💙 (@Celtabaloncesto) October 13, 2021