María Dolores Rodríguez Rodríguez, é a nova presidenta do Comité Galego de Xustiza Deportiva, unha institución da que leva sendo membro desde o ano 2012. Nunca unha muller ostentara es cargo antes. Ademais, este foro conta agora con maior presenza feminina grazas aos nomeamentos de dúas letradas máis: Beatriz Seijo e Carmen López.
A nova presidenta, María Dolores Rodríguez Rodríguez, é licenciada en Dereito pola Universidade de Santiago de Compostela (1.999). Exerce como avogada en diferentes disciplinas do dereito e desde o ano 2000 está colexiada no Ilustre Colexio de Avogados de Vigo. É socia do Bufete Gándara Moure, con sedes en Vigo e na Coruña, un despacho especializado en dereito mercantil, administrativo e internacional. No seu curriculum figura tamén un programa de Desarrollo Directivo PDD- IESE Business School (2006/2007).
As Nosas: Para as persoas que non o saiban, cales son as funcións principais que cumpre o Comité Galego de Xustiza Deportiva?
María Dolores Rodríguez Rodríguez: O Comité é o órgano superior da xurisdición deportiva en Galicia e ten unhas competencias moi amplas, revisora en materia disciplinaria, por canto se encarga da revisión das sancións disciplinarias deportivas e do control das competicións no ámbito federado; exercemos tamén control sobre as funcións públicas das federacións e, en materia electoral, e temos competencia directa para sancionar no ámbito das infraccións en materia deportiva que se contemplan na Lei do Deporte de Galicia.
Mª Dolores Rodríguez: “Non teño máis responsabilidade por ser a muller”
As Nosas: Acaba de converterse na primeira muller que preside este organismo, sinte que asume unha responsabilidade maior por ese motivo?
M.D.R.R.: Non creo que teña unha maior responsabilidade polo feito de ser muller, asumo as funcións que supón o cargo con compromiso e respecto, intentando continuar co traballo de Miguel Juane, o anterior presidente, un gran profesional e profundo coñecedor do dereito deportivo.
As Nosas: Ademais do seu nomeamento, o Comité Galego de Xustiza Deportiva sumou unha maior representación feminina con dous integrantes máis, está a muller a facerse un oco no mundo deportivo?
M.D.R.R.: Cada vez a muller está máis presente en organismos públicos e vaise abrindo camiño tamén con postos de gran responsabilidade nas empresas privadas e en distintos ámbitos, entre eles, o deportivo. O Comité, neste sentido, é un exemplo, e a decisión da Secretaría Xeral para o Deporte de incorporar a dúas mulleres, profesionais e de prestixio, como son Carmen José López e Beatriz Seijo, non cabe dúbida de que axuda en gran medida a visibilizar que hai mulleres avogadas no ámbito xurídico deportivo que poden sumar moitísimo. Con todo, o certo é que a presenza nos órganos federativos de mulleres é escasa e confío en que, pouco a pouco, isto vaia cambiando.
As Nosas: Vostede xa formada parte como vogal. Canto tempo hai que se incorporou ao organismo?
M.D.R.R.: Fun nomeada coma vogal do organismo hai oito anos, polo que este é o meu terceiro nomeamento.
As Nosas: Aínda que leva pouco tempo ao fronte da presidencia, entendo que as responsabilidades son moito maiores agora, como cambiou o seu día a día?
M.D.R.R.: Os maiores cambios son organizativos, afronto as novas responsabilidades como presidenta con ilusión e con implicación, intentando que o traballo do Comité siga sendo eficiente e de calidade, sendo este o principal obxectivo.
María Dolores Rodríguez Rodríguez, presidenta do CGXD: “Que o traballo do Comité siga sendo eficiente e de calidade é o principal obxectivo”
As Nosas: Polo que sei, traballa nun bufete de avogados. Ten pensado compaxinar ambas as dúas ocupacións?
M.D.R.R.: Son socia do Bufete Gándara Moure e traballo nas súas oficinas da cidade de Vigo exercendo a profesión de avogada desde hai máis de 20 anos, e penso facelo por moitos anos máis. O traballo no Comité é esencialmente xurídico e, polo tanto, traballar no bufete nunca supuxo un problema, máis ben todo o contrario, a actividade profesional enriquece o traballo do Comité e viceversa.
As Nosas: Considera imprescindible que os membros do Comité Galego de Xustiza Deportiva teñan un fondo coñecemento do deporte ou non é imprescindible?
M.D.R.R.: As funcións do Comité céntranse en axuizar distintas actuacións no ámbito deportivo, polo que considero que é imprescindible ter amplos coñecementos xurídicos, pero é importante tamén coñecer o funcionamento das federacións e as distintas disciplinas deportivas, que son moi diversas e cada unha ten as súas particularidades.
As Nosas: O anterior presidente do Comité estaba estreitamente vinculado a este mundo, xa que foi xogador de baloncesto. No seu caso, ten tamén un vínculo especial con algunha disciplina deportiva?
M.D.R.R.: O caso de Miguel Juane, que ademais de avogado foi un xogador de baloncesto moi importante, non é o meu. A verdade é que nunca destaquei en ningún deporte, pero iso non significa que non me guste. De feito, sigo con moito interese a actualidade deportiva. Ademais, teño tres fillos que si practican deporte e, polo tanto, pode dicirse que en distintos ámbitos, profesional e familiarmente, estou vinculada ao deporte.
As Nosas: Como nova presidenta do Comité, planea algunha nova liña de traballo para o organismo ou ten pensado centrar esforzos nalgunha cuestión en particular?
M.D.R.R.: O meu obxectivo é avanzar desde o Comité na resolución efectiva dos conflitos xurídicos en materia deportiva coa axuda de Jorge Barros, o secretario do Comité, e aproveitando os amplos coñecementos xurídicos tanto de Ángel Rebolledo, que estivo no Comité desde a súa constitución e que ten unha enorme experiencia no seu funcionamento; como dos novos membros, Carmen José, Domingo Bello e Beatriz Seijo, tamén excelentes profesionais.
Ademais, intentarase ir dando pasos para a creación da Comisión de Arbitraxe que contempla a Lei do Deporte de Galicia, facilitando canles para completar o marco de resolución de conflitos en materia deportiva nos distintos ámbitos. Neste punto, contamos no Comité con Ángel Rebolledo e Domingo Bello, ambos os dous catedráticos de dereito civil e, polo tanto, expertos en dereito privado e en arbitraxe.
A presidenta do CGXD adianta que desde este foro: “Intentarase ir dando pasos para a creación da Comisión de Arbitraxe que contempla a Lei do Deporte de Galicia”
As Nosas: Unha das funcións do Comité ten que ver coa instrución e resolución de expedientes disciplinarios deportivos a membros das federacións deportivas galegas. Porén, cada disciplina deportiva ten un regulamento distinto, de xeito que se poden aplicar sancións distintas para as mesmas infraccións. Hai moita disparidade entre as diferentes federacións?
M.D.R.R.: Cada federación ten as súas propias regulamentacións disciplinarias, se ben, todas elas deben regularse no marco da Lei do Deporte de Galicia que contempla, ademais, a tipificación de infraccións en materia deportiva e as sancións correspondentes de aplicación común, polo que en realidade non existe unha gran disparidade. Con todo, cada disciplina deportiva, como non pode ser doutro xeito, ten as súas peculiaridades e debe estudarse caso por caso, o que esixe un estudo particular de cada asunto que entra no Comité.
María Dolores Rodríguez Rodríguez, presidenta do CGXD: “Cada disciplina deportiva, como non pode ser doutro xeito, ten as súas peculiaridades e debe estudarse caso por caso, o que esixe un estudo particular de cada asunto que entra no Comité”
As Nosas: Durante todo estes anos formando parte do Comité, produciuse algún caso destacable que lembre especialmente?
M.D.R.R.: Moitos casos a verdade é que sorprenden, pero prefiro gardar a confidencialidade neste punto, o que si é destacable é ver o aumento da conflitividade en materia deportiva, pero non creo que sexa un asunto exclusivo do deporte, senón da propia sociedade e dos tempos que vivimos.
María Dolores Rodríguez, a primeira muller á fronte do Comité Galego de Xustiza Deportiva
