Os acontecementos deportivos recobran o alento do público desde as bancadas. O Diario Oficial de Galicia (DOG) publicado hoxe, recolle o levantamento da restrición. Permítese un aforo máximo do 30% en recintos deportivos, sendo o límite total de espectadores de 250 en espazo pechados e de 500 ao aire libre.
Esta é a principal novidade que se recolle no DOG con respecto ao traladado o luns polo presidente da Xunta de Galicia, Alberto Núñez Feijóo, que xa advertira que, según a zona se podería abrir a man na práctica deportiva. Concretamente, nas zonas cun índice de incidencia por debaixo de 500 por cada 100.000 habitantes poderanse abrir ximnasios, piscinas e se poderá practicar deporte (incluso non federado), en grupos que non superen as catro persoas non conviventes.
Así se recolle no DOG que fala de que a “celebración de competicións deportivas con público (…) así como en recintos ao aire libre e noutros locais e establecementos destinados a espectáculos públicos e actividades recreativas, poderá desenvolverse, sen superar o 30% da capacidade permitida, con público, sempre que este permaneza sentado e que a capacidade se calcule, dentro da capacidade permitida, de forma que se garde sempre a distancia mínima de seguridade de 1,5 m nas catro direccións entre os asistentes, salvo que se trate de persoas conviventes, cun límite máximo de 250 persoas para lugares pechados e de 500 persoas se se trata de actividades ao aire libre”.
Advirte o DOG que coa fin “de evitar aglomeracións, a distribución dos asistentes será homoxénea polas butacas e haberá unha planificación axeitada para controlar os accesos e o fluxo de circulación dos asistentes. Debe preverse a apertura de todas as portas dispoñibles coa antelación suficiente”.
Así mismo, deberán establecerse as “medidas necesarias para manter a distancia de seguridade interpersoal no resto das instalacións ou, na súa falta, a utilización de medidas alternativas de protección física”.
Sempre con máscara aínda que haxa distancia
O uso da máscara facial segue a ser obrigatorio nestes espectáculso “en todo momento, mesmo no caso de que se manteña a distancia de seguridade interpersoal nos termos previstos nas medidas hixiénico-sanitarias. Nas butacas ou asentos preasignados, as persoas asistentes non poderán quitar a máscara”.
Outro dos requisitos é que se realicen “tarefas de ventilación nas instalacións cubertas por espazo de polo menos 30 minutos ao comezo e ao final de cada xornada, así como de forma frecuente durante esta e obrigatoriamente ao finalizar cada actividade. No caso da utilización de sistemas de ventilación mecánica, deberá aumentarse a subministración de aire fresco e non se poderá empregar a función de recirculación do aire interior”.
Mantense o rexistro de asistentes
Como xa acontecera cando previamente se activaron restricións similares no deporte o DOG advirte que “deberá existir un rexistro de asistentes ao evento e custodialo durante un mes despois do evento, coa información do contacto dispoñible para as autoridades sanitarias, cumprindo coas normas de protección de datos de carácter persoal”.
Por suposto, especifícase que se deberán intensificar “as medidas de limpeza e desinfección das instalacións con produtos debidamente autorizados e rexistrados”.
Asimesmo, que organice o acontecemento deportivo deberá remitir unha solicitude “acompañada dun plan de prevención de contaxios de acordo cos criterios sinalados no documento de recomendacións para eventos e actividades multitudinarias no contexto da nova normalidade pola COVID-19 en España, elaborado polo Centro de Coordinación de Alertas e Emerxencias Sanitarias da Dirección Xeral de Saúde Pública, Calidade e Innovación, do Ministerio de Sanidade, ou aqueles outros que o desenvolvan, modifiquen ou substitúan”.
