A vida da porteira coruñesa Irene González Basanta repásase na peza documental audiovisual ‘Mamá, futbolista quero ser‘ que se presentaba hoxe no Concello da Coruña. O trailer pódese ver na canle de YouTube de Nós Televisión.
O concelleiro de Cultura e Turismo, Gonzalo Castro, acompañado polo concelleiro de Deportes, Manuel Vázquez, o sobriño-neto da deportista, Fernando Moral del Regaldie, e Ana Viqueira, guionista e produtora do documental e parte do equipo de Nós Televisión, participaron no acto de presentación do documental ‘Mamá, futbolista quero ser‘, que afonda na traxectoria de Irene González Basanta.
Onde ver ‘Mamá, futbolista quero ser‘
A peza audiovisual está promovida polo Concello da Coruña e elaborada por Nós Televisión. ‘Mamá, futbolista quero ser‘ formará parte dun programa de proxeccións do concello coruñés partir do mes setembro para dar a coñecer á cidadanía a figura de Irene González Basanta, sobre todo entre as xeracións máis novas.
Ademais, xa en outubro, estrearase en plataformas cunha audiencia potencial dun millón de persoas en Galicia e de 10 millóns no conxunto de España. En concreto, está prevista a súa estrea o 5 de outubro nas plataformas Movistar Plus, R.
“Consideramos moi importante e necesario darlle visibilidade a vida de González Basanta, pois é un exemplo para promover a igualdade no fútbol e no deporte”, sinalou Gonzalo Castro na presentación.
Ana Viqueira, guionista e produtora da peza, agradeceu o apoio do Concello da Coruña e tamén a divulgación do propio documental na cidade. O feito de que o documental poida ser visto pola xente da cidade herculina é algo que salientou xa que o documental “non só conta unha historia individual senón tamén colectiva“.
A futbolista coruñesa foi, na década de 1920, a primeira muller en cobrar por xogar ao fútbol e chegou a fundar o seu propio club, o Irene CF, do que era a capitá e gardameta.
A través deste documental, ‘Mamá, futbolista quero ser’, afóndase na figura Irene González Basanta e na transcendencia que tivo na súa época. Ademais, esta peza audiovisual tamén se centra nas voces das futbolistas de hoxe en día para amosar os avances acadados durante estes anos.
No documental participan familiares da futbolista coma o seu sobriño-neto Fernando del Moral e outras voces como os xornalistas e biógrafos de Irene, Juan Luis Rodríguez Cudeiro e Rubén Ventureira, a ex futbolista do Karbo e adesradora Pili Neira, a Doutora en Ciencias da Actividade Física e o Deporte da UDC, Cristina López Villar, o historiador Xosé Alfeirán e Silvia Carregal, directora de As Nosas.
