Este mércores foi xornada de recuperación de partidos para os equipos galegos da LF Endesa, con triunfo tanto para o Durán Maquinaria Ensino, que suma a súa terceira vitoria consecutiva, como para o BAXI Ferrol, que acadou o quinto encontro gañado da tempada.
Os dous clubs xogaban a xornada 17 da tempada, co Campus Promete como rival para as lucenses e o Innova TSN Leganés para as ferrolás.
Dous puntos que fan soñar ao Ensino
O partido comezou de cara para o conxunto local, que recibía no Pazo a un Campus Promete asentado na zona media da táboa.
Para o segundo tempo, o partido púxose costa arriba para as galegas, que tiveron que tirar dunha férrea defensa para manterse dentro do encontro. As visitantes apretaban cos turos de Diarra e Estebas, nun momento no que o Ensino xa se vía por debaixo no marcador. O descanso chegou cunha vantaxe de tres puntos para as visitantes.
Tras a reanudación, o club lucense volveu con forza ao seu parqué, aumentando a intensidade ofensiva para reducir distancias. O partido seguía sen un dominador claro, pero o Campus Promete comezaba a acusar as súas escasas rotacións no banco.
Nos derradeiros dez minutos, as lucenses deron un espectáculo na pista, facéndose co control do xogo para asinar a remontada e firmar cun 61-55 a que é xa a terceira vitoria consecutiva para o Ensino.
A xogadora mellor valorada foi a visitanta Diarra, con 20 créditos valorativos. Entre as locais, destacaron Van den Adel e Gomes da Silva, con 11 puntos de valoración cada unha, anotando de forma conxunta 23 puntos e sumando 14 rebotes e dúas asistencias.
⏰ FINAL FINAL FINAL en el Pazo ‼️‼️‼️‼️‼️‼️‼️‼️‼️‼️‼️‼️‼️
TERCERA VICTORIA CONSECUTIVA, el sábado soñamos con el póker???
Jornada 17 🏆#LFEndesa @EnsinoLugoCB 6️⃣1️⃣@CDPromete 5️⃣5️⃣
📸 Rebeca Fernández @rebeca_1826 #VamosEnsino#ActitudRío pic.twitter.com/jQzpFFe6WL
— Ensino Lugo (@EnsinoLugoCB) March 2, 2022
Para o adestrador do Ensino, Fernán Varela, a clave do partido estivo no bo traballo das súas “no rebote e no contraataque, xogando a un ritmo bastante alto. A clave foi que nos malos momentos, que houbo bastantes, fumos capaces de manter a tensión, non virnos abaixo e seguir competindo”.
O técnico mostrouse orgulloso do seu plantel, destacando que cada xogadora é importante nos plans do equipo: “O colectivo axuda. Hai moitos esforzos individuais que non se viron compensados, estou contento pola reacción. O traballo defensivo é de bo nivel, o tomamos como un orgullo e é unha das nosas fortalezas“.
O BAXI ve a luz ao final do túnel
Cun guión similar comezou o duelo en Ferrol entre o BAXI e o Leganés, dous rivais directos que seguen loitando por deixar atrás os postos de descenso.
No primeiro cuarto, as universitarias dominaron con claridade na súa pista e ante a súa afección, que animaba na Malata a un equipo necesitado de puntos. O Leganés respondía con tiros tanto interiores como exteriores, que porén non eran suficientes para alcanzar ás galegas.
Para o segundo tempo, a balanza equilibrouse, pero o bo xogo do primeiro parcial mantiña a vitoria no lado das ferrolás para o descanso.
Na segunda parte do encontro, o BAXI Ferrol foi recuperando terreo paulatinamente. Cos acertos de Koenen, Leaupepe, Natalia Rodríguez (destacando coma sempre desde a liña de tres) e Allen, o colchón de puntos seguía medrando.
Pero as galegas non só atacaban ben. Cun gran traballo defensivo, o Leganés vía como as súas chegadas non se transformaban en tiros, e no último cuarto só sumaron 7 puntos ao seu marcador. Fronte aos 23 das locais, o partido rematou co luminoso nun 77-50.
Taylor Koenen foi a MVP do duelo, con 18 puntos de valoración tras anotar un tiro libre, sete tiros de dous e un de tres, asinar 6 rebotes e dúas asistencias.
Declaraciones de Lino López tras el partido BAXI Ferrol 77 – Innova tsn Club Baloncesto Leganés 50#SienteelUni pic.twitter.com/e9bteMRYO2
— Baxi Ferrol (@UniFerrol) March 3, 2022
Na súa análise do partido, Lino López destacou das súas xogadoras “o traballo, a actitude, o equipo sempre dando o máximo” e engadiu que o equipo “merecíase un partido como o de hoxe”.
A vitoria chegou para as ferrolás despois de ser “regulares durante todo o partido. Tiñamos claro como defender, minimizar as virtudes do rival. En ataque igual, esa pausa. Salvo un tramo do partido, elas foron a roubo e ataques rápidos entón era clave rematar con tiro ou un contra un pero non perder o balón”, explicou en rolda de prensa.
Para López este necesario triunfo non marca necesariamente un punto de inflexión: “Nin cando perdíamos cría que xa tiñamos que facer contas nin agora creo que sexa un punto de inflexión. Teñen que seguir facendo o mesmo, antes non chegaba para gañar, pero o traballo era bo nos partidos e nos adestramentos. O traballo do equipo é excelente, competimos cada partido“.
Co basketaverage vencido ante o Leganés, as ferrolás teñen un motivo máis para pensar na permanencia. Con todo, o míster non se confía. “Oxalá cheguemos ao final todos igualados e con opcións, porque todo é importante. Ao final cada canastra conta, nunca sabes como vai ser a clasificación final, entón tes que pelexar”, concluíu.
Este sábado, os dous equipos galegos volven ter unha cita ligueira. O Ensino recibe en casa a un óso duro, o Perfumerías Avenida, ás 19:15 horas. Algo antes, ás 17:00 horas, é o turno das ferrolás, que tamén xogan como locais, ante o Lointek Gernika.
