Dobre alegría na primeira xornada da nova tempada da LF Endesa. A máxima categoría do baloncesto español conta con dous equipos galegos, o BAXI Ferrol e o Durán Maquinaria Ensino, e os dous sumaron vitoria no inicio ligueiro.
O partido da fin de semana supuxo o regreso á máxima división para as ferrolás, que demostraron o seu alto nivel apuntándose o primeiro triunfo do curso. Pola súa parte, as lucenses están en medio dunha eliminatoria para a EuroCup, que se decidirá no Pazo ante o Campobasso, e o equipo chega a este encontro definitorio cun triunfo ligueiro.
O BAXI volve á LF Endesa triunfando
Despois dunha tempada de 10, o BAXI Ferrol volvía á LF Endesa co obxectivo de manter o alto nivel e comezar o camiño cara a permanencia. As ferrolás de Lino López non defraudaron na súa reestrea, na que ademais de gañar ante o Campus Promete por un 74-69, o fixeron ante a súa afección na Malata.
Xa no primeiro tempo o equipo local foi quen de controlar o tempo do partido, movendo con facilidade o balón e sen fallar baixo o aro. Cunhas inspiradas Taylor Koenen, Milica Ivanovic e Natalia Rodríguez, o equipo foise abrindo paso no electrónico, rematando o parcial cunha vantaxe de cinco puntos.
No segundo cuarto, o ritmo baixou nas filas galegas, feito que aproveitou o Campus Promete para recuperar terreo perdido, aínda que sen alcanzar ás galegas. O descanso chegou co 34-30.
Na segunda metade deste encontro de LF Endesa, o guion do partido non mudou. As xogadoras de Lino López volveron tomar o mando do duelo, con Koenen como protagonista no apartado anotador, apoiada por Jenna Allen e Ivanovic. O último tempo chegou con vitoria local, e malia os esforzos das visitantes, o BAXI afianzou por un 74-69 un gran inicio de LF Endesa.
A MVP deste encontro foi Taylor Koenen, quen acadou un 22 de valoración, tras 15 puntos, once rebotes e tres asistencias.
Vitoria como motivación para o Ensino
O apretado calendario non pasa factura ao Ensino. As galegas xogaron a semana pasada o clasificatorio para a EuroCup ante o Magnolia Campobasso, perdendo por un punto en terras italianas e xogándoo todo na volta no Pazo.
Antes desta final, o Ensino debía viaxar a Bembibre para iniciar a competición da LF Endesa, xogando ante o Embutidos Pajariel Bembibre e vencendo por un 50-67. Neste encontro, o conxunto de Miguel Ángel Ortega tomou o mando do duelo, adiantándose no marcador xa no primeiro cuarto.
No segundo parcial, a vantaxe galega aumentou aínda máis, dirixindo xa o partido hacia unha vitoria lucense. Cunha defensa formidable, o Ensino non daba opcións ás locais, e o descanso chegou cun 23-36 no marcador.
Na segunda metade, o encontro seguiu en mans das galegas, que foron capaces de manter a distancia co Bembibre en todo momento, sen que as rivais chegaran a supoñer un perigo. Chegados ao último tempo, o partido xa estaba decidido, e as lucenses só tiveron que manter o ritmo para levarse a primeira vitoria da tempada.
Ademais, o Ensino volve a Lugo co recoñecemento de Sofia Gomes como MVP da cita, sumando un total de 22 puntos de valoración tras anotar 13 puntos e facer once rebotes.
