- Galicia brilla no V U17 Portugal Open 2025 con dous podios históricos colleitados polas deportistas galegas Inés Poncela e Sara del Castillo, ambas as dúas do Club del Mar de San Amaro da Coruña.
A expedición galega viaxou ata Caldas da Rainha (Portugal) acompañada polos técnicos Rafael Vázquez e Rubén Espinosa, para disputar o V U17 Portugal Open 2025, e regresou con dous resultados espectaculares que fan historia para o bádminton galego, segundo informa a Federación Galega de Bádmintón.
A parella conformada polas deportistas herculinas Inés Poncela e Sara del Castillo proclamouse campioa en dobres femininos (DF). As deportistas do Club del Mar de San Amaro , completando un torneo impecable no que demostraron unha enorme solidez e conexión en pista. A parelle de galegas impúxose ás mellores parellas internacionais, culminando cunha final chea de intensidade e madurez competitiva.
Ambas as dúas xogadoras están no Centro Galego de Tecnificación Deportiva de Pontevedra (CGTD).
Prata individual para Sara del Castillo
Ademais dese ouro en dobres femininos, Sara del Castillo completou unha actuación excepcional na competición individual feminina (IF), acadando a medalla de prata. Fíxoo logo dunha traxectoria brillante que a levou ata a final, onde loitou con carácter e talento ata o último punto.
A expedición galega estivo formada por Guillermo Valdés, Darío Miguéz, Xulia Otero, Maia Freire, Marta Álvarez, Adrián Seijo e David Casas. Nesta cita do V U17 Portugal Open 2025 Galicia amosou “un alto nivel competitivo, sumando experiencias internacionais e deixando boas sensacións para o futuro”, explican desde a Federación Galega de Bádmintón, que asegura que “estes resultados consolidan a Galicia como unha potencia emerxente no bádminton de base, confirmando o excelente traballo do Centro de Tecnificación e dos clubs galegos”.
