A 24ª xornada de LF Endesa deixou unha dobre derrota nos clubs galegos. Tanto o BAXI Ferrol como o Durán Maquinaria Ensino perderon nos seus partidos a domicilio, ante o Movistar Estudiantes e o Lointek Gernika respectivamente.
As galegas seguen no pozo da clasificación da LF Endesa, coas ferrolás como penúltimas con 29 puntos e as lucenses duodécimas con 31.
A lesión de Villegas marca a derrota do BAXI
O BAXI Ferrol desprazábase na fin de semana a terras madrileñas para enfrontarse ao Movistar Estudiantes, un rival da zona media da táboa, con xogadoras potentes como Mariona Ortiz ou Carter.
Precisamente elas foron dous pesadelos para as galegas, que se vían sen opcións de frear o seu xogo exterior. O partido comezou con dominio madrileño, pero con forzas igualadas a ambos lados da pista. A presión das galegas servía para impedir que as locais se fixeran co marcador, aínda que a vantaxe mantíñase do seu lado.
Natalia Rodríguez e Leaupepe anotaban para o BAXI Ferrol mentres que no bando contrario Carter lideraba ao Movistar Estudiantes. A presión das unviersitarias impedía que o conxunto local anotase comodamente e cos esforzos de Koenen, o descanso chegou co 41-36.
Tras o paso por vestiarios, o terceiro cuarto foi das galegas. O equipo de Lino López subiu a marcha para manter unhas distancias curtas con as rivais, ameazando coa remontada. A través de contraataques e facendo dano desde a pintura, o BAXI Ferrol poñíase a cinco puntos das locais. Con todo de cara, o partido torceuse para as ferrolás.
Nun salto dun rebote ofensivo, Alicia Villegas mancouse, cunha nova lesión de xeonlo. A baixa da 2 do club ferrolán trastocou ás galegas, que perderon o ritmo do partido. No último cuarto, Estudiantes empezou con forza, cun parcial 8-0 que botaba por terra calquera opción de vitoria no bando galego.
As universitarias resistiron os golpes finais, cunha Carmen Grande destacando en defensa fronte ao seu exequipo. O partido mudou de guion neste último tempo, quedando completamente en mans das locais, que vencerían nesta xornada de LF Endesa finalmente por un 80-65.
¡Porque caerse está permitido, pero levantarse es OBLIGADO! 🚀💪🏻
Gracias a todos por los mensajes de apoyo, no puedo estar más agradecida por toda la muestra de cariño y creedme que eso sólo me da más fuerzas para levantarme. Toca pasar por el taller… ya sabéis, unos retoques… pic.twitter.com/JbB7R6yjSF— Alicia V. (@alivillegass) March 14, 2022
Lino López: “Estivemos ben en defensa”
No postpartido, Lino López destacou os labores defensivos do seu equipo, asegurando que por momentos “estivemos ben en defensa e puidemos xogar máis fluído, sendo capaces de estar no partido”.
Sobre a lesión de Ali Villegas, o adestrador admitiu que “non ten boa pinta”. Tamén recoñeceu que a súa marcha da pista afectou ao conxunto, que quedou “mentalmente afectado”.
Mucho ánimo campeona @alivillegass 💪💪 https://t.co/ddxFDJoKjY
— Ensino Lugo (@EnsinoLugoCB) March 12, 2022
Derrota do Ensino nos minutos finais
En Biscaia, a emoción da LF Endesa viviuse ata os últimos minutos do duelo que enfrontaba a Lointek Gernika co Durán Maquinaria Ensino. As lucenses foron de menos a máis, rozando cos dedos a remontada, pero cedendo finalmente ante as vascas.
Nos primeiros compases do encontro, as galegas cometeron erros defesivos, especialmente nos últimos segundos das posesión, o que lles pasaría factura ante Moore, quen non perdoaba baixo aro, sendo a absoluta protagonista do partido. Desde o ataque, o Ensino apostaba por un xogo plural, sumando puntos desde a pintura, pero sen recortar distancias coas locais.
No segundo cuarto, a balanza equilibrouse cun Ensino máis certeiro nas defensas, que conseguía controlar mesmo á 2 das vascas, unha Moore que viu baixar o seu porcentaxe anotador. No bando galego, destacaba Lizarazu, acompañada por Alba Prieto e Laura Aliaga.
Despois da pausa, o partido virou cara as lucenses, que viron, e aproveitaron, a súa oportunidade de rabuñar puntos. Co paso do tempo o conxunto irmandiño ía collendo ritmo, e aumentando o seu acerto desde a liña exterior, o que lle permitía colocarse por diante por primeira vez no duelo.
O Lointek non baixou os brazos, e presionou ás galegas ata que estas comezaron a ceder canastras doadas, que volvían a poñer ás vascas por diante no electrónico, para chegar cun axustadísimo 59-57 aos dez minutos finais.
No último cuarto, o conxunto local fíxose co control do partido, impedindo que as galegas anotasen de tres. Cunha impecable Moore, que tivo un acerto do 92,3% baixo aro, as vascas seguían sumando puntos ante un Ensino sen resposta, que viu como o partido se ía por un 84-75.
Fernán Varela: “Conceder no noso aro 13 de 29 rebotes é demasiado”
Para o preparador das lucenses, Fernán Varela, a clave do partido estivo na defensa, explicando os erros cometidos polo seu equipo e que o levaron á derrota: “Conceder no noso aro 13 de 29 rebotes é demasiado. Foi unha vía de anotación moi boa para o Gernika”.
O adestrador recoñece que o seu plantel fixo méritos para levarse o partido de LF Endesa, pero tamén salienta que o bo nivel en defensa non se mantivo, o que permitiu que o equipo local anotase desde a pintura con facilidade.
En liñas xerais, Varela resume a actuación das súas nesta xornada de LF Endesa destacando que “o equipo peleou, respondeu e non se viu abaixo en ningunha das múltiples ocasións, Esa é a liña que temos que seguir”.
