Este fin de semana no Navia acollerá dous partidos, en sábado e domingo. O primeiro deles enfronta ao Celta Zorka Recalvi co Azkoitia Azpeitia (13:30 horas) e o segundo co Magec Tías (11:00 horas). Así, esta semana preséntase como unha oportunidade para que as celestes cheguen ás nove vitorias consecutivas.
Hai que remontarse ata o trece de decembro para recordar a última vez que as viguesas perderon un partido. Foi ante o intratable BAXI Ferrol nun igualado 60-71. Desde entón, as de Cristina Cantero non volveron coñecer a derrota pero as vitorias polo de agora non se traduciron nun aumento de posición.
O Celta Zorka Recalvi segue sen entrar no podio e, de feito, nas últimas nove xornadas o equipo pasou da cuarta posición á quinta. Pero esta falta de coherencia explícase por dous motivos: os partidos que aínda ten por disputar o conxunto celeste, sendo o cadro con menos duelos disputados, e o acerto tamén certeiro dos seus rivais directos.
Así, as galegas suman na Liga Feminina 2 34 puntos, en 15 vitorias e catro derrotas, estando a un punto do cuarto (Miralvalle) e terceiro (Azpeitia) e a tres do segundo (Ardoi). O líder é xa inalcanzable, con 42 puntos.
Primeiro combate contra o Azpeitia
Quedan cinco partidos, sete no caso do Celta, en xogo, polo que as de Vigo aínda poden escalar na clasificación. Un paso clave será gañar ás vascas do Azkoitia Azpeitia, o seu primeiro rival da fin de semana.
O partido celebrarase esta semana, pero corresponde á 20ª xornada, que non se puido disputar por un positivo no plantel visitante.
As vascas serán un rival de altura para as viguesas, xa que acumulan o mesmo número de vitorias e o punto de diferencia explícanse polo duelo de máis disputado polo Azpeitia.
Unha desas vitorias foi lograda ante o propio Celta no partido de ida celebrado en Guipúzcoa. Nesa sétima xornada o resultado final foi dun 73-60. Para coñecer o devir dunha, como todo parece indicar, igualada volta, haberá que agardar ao sábado.
Ao día seguinte, o Azpeitia tamén ten outra cita, aproveitando a súa visita a Galicia. Será ante o Arxil, o domingo ás 12:00 horas.
Segundo asalto contra o Magec Tías
Para o domingo, a cita preséntase previsiblemente máis doada. O Celta recibe ao Magec Tías no marco da 22ª xornada. Porén, as de Cantero non deben confiarse ante un equipo que se xoga o seu futuro na competición.
As canarias son colistas, a dous puntos do seguinte clasificado, polo que loitarán con unllas e dentes neste tramo final de tempada.
De perder as galegas isto sería unha sorpresa para ambos bandos, xa que xa na ida o Celta Zorka Recalvi foi o trunfador. A novena xornada resolveuse cun 41-56 a favor das viguesas, nun partido no que gañaron cada cuarto agás o último, perdido só por un punto.
Ambos partidos poderán seguirse vía streaming, o primeiro deles nesta ligazón e o segundo nesta.
