O debate está aberto na ximnasia rítmica a raíz da decisión da Real Federación Española de Gimnasia (RFEG) de abrir unha canle de retransmisións online para as probas do calendario nacional. A polémica xurde polo feito de nese espazo, as competicións estarán accesibles mediante pago por visión (pay per view, PPV). Desde a Federación Galega de Ximnasia, o seu presidente, José Manuel Estévez Feijoo, vén de facer pública unha carta na que pide que a RFEG “se retracte”.
O pasado día 12 de marzo, a Real Federación Española de Gimnasia (RFEG) explicaba que puña en marcha “unha nova canle de retransmisións online co que cubrirá todas as competicións do calendario nacional de 2021″.
Desde a RFEG, que preside o ex ximnasta campión do mundo Jesús Carballo, se explicaba que ese espazo contaría “coa tecnoloxía pay per view” e que se pretendía “dar un salto de calidade nas súas retransmisións por streaming e permitir así que todas as especialidades de ximnasia vexan integramente retransmitidos os seus campionatos de España”.
Na súa explicación a RFEG argumentaba que “o sistema permite a familiares, afeccionados e seguidores da ximnasia poder adquirir a súa entrada ben para ver o evento online ou para a súa posterior visualización dentro das 72 horas posteriores á súa emisión en directo. As entradas contan cun código único e intransferible que permite acceder á plataforma de forma sinxela”.
Para a federación estatal de ximnasia, esta acción representaba “un paso máis na súa aposta pola difusión e visibilidade da ximnasia española xa que, por primeira vez, as competicións nacionais poderán verse desde calquera recuncho do mundo”.
Primeiro paso dunha “transformación dixital onde a tecnoloxía xere valor”
Anunciaban tamén que este proxecto era “o primeiro dunha lista nos que está a traballar a Federación para dotala dunha transformación dixital onde a tecnoloxía achegar valor. Pódese acceder á compra de entradas para seguir a competición online a través de https://bit.ly/streamingRFEG”.
O malestar empezou a xurdir entre deportistas, familias e clubs xa que houbo a quen non gustou a chegada do pago por visión de contidos que até o de agora eran de balde era unha situación.
Tal foi así que José Manuel Estévez Feijoo, presidente da Federación Galega de Ximnasia, lle trasladou ao seu homónimo na estatal, o ex ximnasta Jesús Carballo, a conveniencia de recular na decisión tomada a través dunha carta.
José Manuel Estévez argumenta que tanto os estatutos da RFEG como os da FGX falan de que son funcións de ambos os dous organismos a “promoción” e “divulgación” da ximnasia. En base a esas funcións estipuladas apara as federacións estatal e autonómica, nunha carta que se pode ler na web da Federación Galega de Ximnasia, Estévez expón:
“Tras ter coñecemento pola web da Federación e polas súas redes sociais de que os próximos campionatos se van retransmitir polo sistema de pago por visión (22€ polas competicións da vindeira semana), para nós é un paso atrás moi importante no cumplimento das funcións”.
Estévez: “Polo ben da ximnasia, retráctense da decisión”
Na súa misiva, José Manuel Estévez Feijoo traslada ao presidente estatal, Jesús Carballo, varias preguntas para as que di non ter resposta:
“Como imos divulgar este deporte se estamos a esixir aos pais/nais, clubs, adestradores/as, despois dos enormes gastos abordados para poder estar presentes nestas competicións, nun período tan complicado desde o punto de vista sanitario, económico e deportivo, que teñan que pagar por ver aos seus fillos/as, aos seus ximnastas e/ou aos seus compañeiros/as?
Como pretendemos que persoas alleas á actividade, novos afeccionados, tomen interese por esta fermosa especialidade deportiva, se teñen que abonar as cantidades citadas?
Que pasa coas propias compañeiras desprazadas, como participantes, que, por protocolo COVID, non poden estar na instalación, terán que pagar tamén?
Como mantemos a ilusión dos/as novos/as ximnastas, se para poder mirarse no espello das súas compañeiras participantes, dicímoslle que ten que ser previo pago da cantidade fixada na plataforma de ‘streaming’?
Lanzadas ao aire estas preguntas, como presidente da Federación Galega de Ximnasia, Estévez plantaxe que “polo ben da ximnasia”, a RFEG se “retracte da decisión tomada e recupere o camiño anterior. Esperamos que a retransmisión en streaming volva ser totalmente gratuíta, onde se velaba, de forma moi atractiva, pola difusión da ximnasia en xeral e da rítmica en particular”, asevera o presidente da galega.
Clubs como o Ximnasia Pavillón de Ourense trasladaron ás súas redes o malestar pola decisión da RFEG.
Algúns clubs activaron como sinal de protesta o colocar nos seus perfís un crespón negro en sinal de loito ante iniciativa da federación estatal. Así o explicaba o C.D. Ximnasia Rítmica Compostela.
Hai incluso aberta unha iniciativa de recollida de sinaturas na plataforma Change.org para que non se cobren os campionatos nacionais de ximnasia da que se fai eco o Club Ximnasia Porriño, e que no momento de elaborar esta información contaba con 10.000 adheridas.
Arestora xa hai torneos de ámbito internacional de disciplinas da ximnasia, por exemplo a ximnasia estética, que teñen activado o pago por visión para achegar as competicións as persoas seareiras desta modalidade deportiva.
As transmisións a través de sistemas de streaming están en auxe en moitas disciplinas deportivas e en diferentes categorías debido ás limitacións de aforo que hai nos recintos deportivos, así como ás limitacións de movementos entre territorios, non só entre concellos en Galicia, se non tamén entre comunidades autónomas do estado español, e no resto de países.
O streaming abre as portas do deporte feminino galego a todo o mundo
