Na Real Federación Española de Balonmano a Xunta Directiva vén de proporlle á Comisión Delegada, órgano de goberno da RFEBM, que considere “finalizada a tempada 2019-2020 sen executar ningún tipo de descenso deportivo, pero si con ascensos de categoría”. Así o comunicou esta federación a través da súa web e redes sociais.
Esta decisión de dar por finalizada a competición afectaría a clubs galegos como o Conservas Orbe BM Porriño, Mecalia At. Guardés, A.D. Carballal, SAR Rodavigo, Rubensa Porriño ou Lavadores, así como a xogadoras galegas que militan en diferentes clubs nas competicións estatais españolas.
A Xunta Directiva reuniuse de xeito telemático e ao remate da xuntanza o presidente, Francisco V. Blázquez, emitía un comunicado no que anunciaba os termos da proposta que van remitir á Comisión Delegada da RFEBM que é o órgano de goberno da mesma e, polo tanto, o encargado de aceptar ou non unha proposta de semellante calado para o balonmán español. Esta decisión vén motivada pola pandemia do COVID-19.
Consultas previas da RFEBM a diferentes estamentos do balonmán
Así, no seu comunicado, Francisco V. Blázquez sinala que “elevaremos unha proposta á Comisión Delegada para dar por finalizadas e que, por tanto, non se disputen máis partidos nas competicións nacionais esta tempada”.
Explicaba o presidente que esta decisión “é resultado das consultas a diferentes estamentos do noso deporte, clubs, árbitros, adestradores, xogadores, xogadoras; así como co Consello Superior de Deportes para tentar cubrir as máximas garantías de seguridade sanitarias, e con outras federacións nacionais deportivas que dispoñen de ligas regulares, a fin de tratar de tomar unha decisión conxunta polo ben do deporte español”.
Sen descensos pero con ascensos
Francisco V. Blázquez prosegue indicando que quere “informar que esta Xunta Directiva vai propor á Comisión Delegada que esta tempada 2019/2020 non existan descensos deportivos entre os equipos que participan en competicións nacionais, pero si queremos premiar a aqueles equipos que estiveron traballando durante seis e sete meses, permanecendo nos postos altos da clasificación, e que queren dar un salto deportivo; polo que proporemos que existan ascensos nas distintas competicións nacionais, velando polo ben do noso deporte e tratando de ser o máis xustos posibles”.
A decisión final, por tanto, queda en mans da Comisión Delegada que, en caso de aceptar a proposta, debe ser a encargada, xunto co Departamento de Competicións da Real Federación Española de Balonmán, de articular o procedemento para establecer as prazas de ascenso en cada categoría.
📝 COMUNICADO OFICIAL @RFEBalonmano | La Junta Directiva va a elevar una propuesta a la Comisión Delegada, órgano de gobierno federativo, planteando la suspensión definitiva de las competiciones nacionales y la finalización de la temporada 2019/2020
👉 https://t.co/G2OJTzrcNc pic.twitter.com/HEaAIWas54
— RFEBalonmano (@RFEBalonmano) April 24, 2020
