As seis persoas que conforman actualmente a directiva do Mecalia Atlético Guardés dimitiron en bloque dos seus cargos. Alegan estar cansos e piden maior apoio institucional. “Non foi unha decisión doada, pero levamos oito anos reclamando o mesmo. Ata aquí chegamos”, di con contundencia o presidente, José Manuel Silva.
“O principal sustento do Atlético Guardés é a empresa privada”, apunta José Manuel Silva que explica que a situación ven de lonxe. “De antes incluso de comezar esta tempada”. Neste sentido, desde a presidencia reclámase maior apoio de institucións de ámbito local. E advírtese de que periga a continuidade do club na máxima categoría.
Segundo explicaba Silva, o club precisa máis ingresos para poder manterse nos seus actuais retos deportivos. O Mecalia Atlético Guardés milita actualmente na máxima categoría do balonmán español, a Liga Guerreras Iberdrola, e xoga competición europea na Challenge Cup.
José Manuel Silva: “Non foi unha decisión doada, pero levamos oito anos reclamando o mesmo. Ata aquí chegamos”
O ata o de agora presidente do equipo da Guarda explica que a entidade recibe achegas da empresa privada e tamén da Xunta de Galicia, Deputación de Pontevedra e Concello da Guarda. “Ata maio temos garantido o patrocinio”, sinala en referencia á firma Mecalia.
O Mecalia podería non xogar a Liga Guerreras a vindeira tempada
A situación é complicada logo da dimisión da directiva que plantexa a situación como un punto de inflexión. “Presentamos en bloque a dimisión. Segundo os estatutos pasamos a ser Xunta Xestora ata que se presente unha candidatura á presidencia. A partir de aí se convocarían eleccións. Se non se presenta ninguén, cando chegue o momento de inscribir ao primeiro equipo do club na competición o vindeiro ano, non poderemos facelo. Será unha traxedia”, vaticina Silva.
José Manuel Silva: “Non me gustaría que isto rematase así, por A Guarda, por Pontevedra e por Galicia”.
Xa desde o seu posto na Xunta Xestora do conxunto do Baixo Miño, José Manuel Silva aseveraba a As Nosas: “Non me gustaría que isto rematase así, por A Guarda, por Pontevedra e por Galicia”.
Un referente do balonmán feminino galego
O Mecalia Atlético Guardés é un equipo de referencia no balonmán feminino galego. Chegou a ser campión de Liga e na actualidade ocupa a segunda praza na táboa clasificatoria da Liga Guerreras Ibedrola. Trátase da máxima categoría do balonmán feminino español e tamén xoga nela o conxunto galego do Conservas Orbe BM Porriño.
Na Challenge Cup o equipo do Baixo Miño vai xogar os octavos de final co equipo lituano do AMCE-Zalgiris Kaunas o sábado 1 e domingo 2 de febreiro. Estas citas europeas están fixadas para ás 19:00 horas na Sangriña (A Guarda).
Partido, o venres 24 na Sangriña
Pero antes, as xogadoras que adestra Prades, teñen ante si outro reto deportivo de ámbito estatal. Van recibir na Sangriña ao primeiro clasificado da Liga Guerreiras Ibedrola, o Super Amara Bera Bera, un clásico deste deporte. Será mañá venres 24 ás 21:00 horas.
