A haltera galega Digna Silo do Club Halterofilia Coruña, competiu coa Selección Española de no Campionato de Europa Sub-15. A deportista acadou tres subcampionatos.
Digna Silo regresa de Moldavia con tres subcampionatos de Europa Sub-15 no peto. A deportista do CH Coruña competiu na cidade de Chisinau na categoría de peso corporal de +81 quilos. No mesmo peso, pero en Sub-17 competiu a súa compañeira de club Paula Canedo quen, desta volta, tivo que conformarse con tres quintos postos.
A primeira en competir en Moldavia foi Digna Silo. A deportista da Coruña subiu á tarima e fíxoo ao grande. Digna Silo debutaba na Selección Española pero non se notou na súa actuación. A haltera do CH Coruña competiu con seguridade e recolleu as tres medallas de prata da categoría de +81 quilos.
Ver esta publicación en Instagram
Digna Silo bate o récord de España
Foi subcampioa en arrancada, dous tempos e no total olímpico. Para colgarse a prata do pescozo, Digna Silo levantou 75 quilos en arrancada, 92 en dous tempos e 167 no total olímpico. Todas estas marcas son novos récords de España Sub-15. Antes de deixar a marca neses pesos a deportista coruñesa foi batendo ata en catro ocasións os récords de España durante a competición europea celebrada en Moldavia.
Unicamente a haltera italiana Sara Dal foi quen de superar a Digna Silo o que a fixo acreedora do ouro. O terceiro chanzo do podio foi para a romanesa Ecaterina Cismanescu (dous tempos e total olímpico) e a polaca Mariana Gora en Arrancada.
Ver esta publicación en Instagram
Paula Canedo queda no quinto lugar
Logo de que competisen os Sub-15 foi a quenda dos Sub-17. Aí entraba en xogo neste Campionato Europeo de halterofilia a deportista galega Paula Canedo, tamén do Club Halterofilia Coruña. Pese a tratarse dunha haltera con experiencia internacional, que volvera con metais nos dous últimos Europeos, desta volta Paula Canedo tivo que conformarse con tres quintos postos.
A competición foi dura para Paula Canedo que levantou 78kg na modalidade de arrancada, 100kg en dous tempos e 178kg no total olímpico.
Nesta ocasión o podio na categoría Sub-17 para o peso corporal de +81 kg ocupáronno Tuana Suren de Turquía, Hanna Kalashnyk e Sofía Kozak, ambas as dúas de Ucraína.
