Festival goleador de Lucía Pardo para poñer fin a unha serie de cinco partidos sen gañar. A segunda parte de LP foi para enmarcar. Dous goles (sumado ao da primeira metade) e grandes xogadas creando moito perigo. Despois da tormenta de resultados chegou a calma para o Friol co festival da de Outeiro de Rei que asina un hat trick.
O Peluquería Mixta Friol chegaba ao encontro con moitas dúbidas e pantasmas na testa, froito da praga de lesións e dos cinco partidos sen coñecer a vitoria. Esta victoria permitirá ás galegas recurtar distancias cos equipos que a supera na táboa clasificatoria.
Moi cedo afastaron as de Geluco as dúbidas cun gran comezo de partido, metendo ao Atlético de Madrid B no seu campo e levando o peso do encontro nos primeiros minutos.
As galegas buscaron o gol desde o pitido inicial e xa no minuto 10 Jana Xin, gardamallas do Atleti, tivo que intervir nun par de ocasións. Preto do minuto 10, LP tivo na súas botas o primeiro tras un gran golpeo de falta á frontal do área. Houbo dominio de xogo e ocasións para as lucenses no primeiro cuarto de hora de partido.
A reacción das madrileñas chegaría no minuto 22 tras un centro á área desde o lanzamento dunha falta lateral que Alejandra Bernabe rematou de cabeza e o coiro foise lambendo o longueiro da meta defendida por Laura. A cancerbeira galega sería protagonista minutos despois cunha gran estirada tras un desmarque en ruptura de Ortega que, cunha vaselina puxo en moitos apuros a Laura. De non ser pola man da porteira local estariamos falando do 0-1.
Na segunda metade dos primeiros 45 minutos apretou o Atlético de Madrid e tivo a súa gran ocasión de poñerse por diante cun gol anulado no 32 a Maria Isabel por fóra de xogo. Tras un primeira parte moi disputada con 20 minutos para cada conxuntos ambos equipos enfilaban o camiño dos vestiarios con empate a cero no luminoso de A Reigosa.
LP 45 e gol
O comezo da segunda parte foi un calco do acontecido na primeira pero nesta ocasión o Friol si que conseguiu materializar e poñer o primeiro, a poucos segundos do pitido da reanudación, para alegría das preto de 250 persoas que presenciaban o partido nas gradas da Reigosa.
LP sería a protagonista tras unha gran xogada da capitá Natalia Llanes por banda esquerda que deixaba a pracer para que a de Outeiro de Rei empurrara o coiro ao fondo das mallas na área pequena. 1-0 no minuto 45′ da perla do Friol.
A alegría das galegas duraría tan só un minuto e Leire Peña poría o empate tras un rexeite na área que a zaga lucense non puido despexar. Volta a empezar para as de Villar.
Corría o minuto 62 cando Geluco Villar movía o banco en busca do gol da vitoria. Retirábase unha Mushu moi activa que completou un gran encontro pero que arrastraba un cartón amarelo da primeira metade. Entraba María Corral no seu sitio.
O partido pasou por unhos intres sen dominio claro con varias ocasións para varios equipos. Geluco volvía a buscar un revulsivo coa entrada de Nerea por Fanny no minuto 70′. Tras o cambio, a capitá deixaba o brazalete a Lucía Pardo que ademáis cambiábase de banda e pasaba a xogar polo perfil esquerdo.
E o cambio de posición de LP non puido saír mellor. Jone encontrou un espazo ás costas da zaga colchoneira e provocou unha falta escorada ao perfil esquerdo da meta de Jana Xin. Lucía Pardo colleu o balón, colocouno e cun gran golpeo puxo o 2-1 no luminoso e o corazón a mil a toda a afección. Golazo para facer o noveno na súa conta particular no que vai de tempada.
Penalti e Hat trick
LP quería levar o balón para casa e así foi. No minuto 84 robou un balón en banda esquerda en campo propio e tras percorrer 60 metros en conducción entrou na área e foi a agarrada por unha defensora colchoneira co correspondente penalti.
Lucía Pardo volveu a coller a responsabilidad e non fallou. O seu tino desde o punto de penalti supuxo na súa conta particular un hat trick e na común das lucenses, tres puntos de luxo para un Friol que volve a saborear as meles da vitoria (3-1).
FICHA TÉCNICA
PM FRIOL: Laura, Vicky, Natalia, Fanny (Nerea, min 60), Nati, Jessi, Lucía Pardo, Jone (Marta Cuevas, min 85), Andrea, Goretti e Mushu (María Corral, min 62).
ATLÉTICO DE MADRID B: Jana Xin, Ángela (Ana, min 52), Paula, Manjarín, Bernabé, Sara (Elvira,min 62), Claudia, Andrea (Candela, min 67), Leire, María Isabel (Elena, min 48) e Laura.
GOLES: 1-0, min 47: Lucía Pardo. 1-1, min 48: Leire. 2-1, min 77: Lucía Pardo. 3-1, min 84: Lucía Pardo, de penalti.
