O Viaxes Amarelle FSF márchase ao parón do Europeo de Seleccións cunha agre derrota en casa do AD Sala Zaragoza por un marcador de 4-2. Este resultado mete de cheo ao equipo dirixido por Jorge Basanta na pelexa pola permanencia.
Queda pouco menos dun terzo da competición para conseguir a ansiada continuidade na Primera Federación Futsal Feminina, a máxima categoría do futsalfem estatal que conta neste curso con cinco equipos de Galicia competindo e representación de todas as provincias galegas.
O partido entre a AD Sala Zaragoza e o Viaxes Amarelle FSF empezaba con dous equipos que se mostraban moito respecto o un polo outro sobre na cancha. Ambos os dous bloques de futbolistas esperábanse en media cancha para empezar a presión sobre o balón, e así transcorrían os primeiros minutos sen ocasións para ningún dos dous conxuntos.
A primeira ocasión clara chegaría para o Viaxes Amarelle FSF, cunha xogada por banda de Èlia Gullí, que colocaba ao centro da área e onde Tety enviaba fóra por pouco. Con todo, o primeiro gol do partido foi aos oito minutos de xogo, cando as mañas conseguen mandar un balón ás costas da defensa herculina e deixar a Laura Boix nun un para un con Leti Rojo. Na xogada a maña non perdou e bateu á galega subindo así o 1-0 ao marcador.
Aínda quedaba partido por diante, e os equipos seguían cunha dinámica similar na primeira parte, ata que a falta de tres minutos para o tempo de descanso, as herculinas empezaron a exercer unha presión de balón máis alta, pero o gol tampouco chegaba, e o partido íase ao descanso co parcial de 1-0, para as locais.
Á volta do descanso, o Viaxes Amarelle FSF saltou á pista maña cunha presión alta a toda cancha sobre o seu rival para tratar de meterse no partido e loitar polos puntos en xogo. Logo dos primeiros instantes de partido parecía que as galegas estaban a xerar perigo, pero novamente as primeiras en anotar serían as locais, que cun potente disparo exterior poñían o 2-0 no marcador, a falta de pouco máis de dez minutos para o final do partido.
Tras este segundo gol, as galegas que adestra Jorge Basanta decidiron saír por todas. O técnico optou polo xogo de cinco. Foi así como as coruñesas conseguiron recurtar distancias na primeira ocasión que tiveron. Foi cun balón ao segundo pau, que Carol Agulla non perdou.
O conxunto herculino do Viaxes Amarelle FSF continuou co xogo de cinco para meterse no partido, tras o bo inicio, pero unha perda de posesión en cancha do AD Sala Zaragoza, deixaba o balón a Laura Boix, que subía o 3-1 ao marcador a falta de seis minutos para o final do encontro.
O Viaxes Amarelle FSF mantivo a súa aposta polo xogo de cinco para meterse no partido. A falta de catro minutos para o final, Carol Agulla volvía recurtar distancias, subindo o 3-2 ao marcador.
Co electrónico aberto, as herculinas mantiveron o xogo de cinco á procura de rascar os tres puntos en xogo ante un rival directo.
A falta dun minuto para o final, unha presión alta de balón na saída de xogo de cinco das visitantes, provoca unha perda de balón en cancha propia, que as visitantes aproveitan para poñer o 4-2, por medio de María Moreno, mentres as herculinas non teñen á porteira en cancha.
O Viaxes Amarelle FSF, a dous puntos do descenso
Con este resultado, as herculinas do Viaxes Amarelle FSF manteñen a súa posición en postos de permanencia, pero con só dous puntos de marxe sobre os que colocan aos equipos en descenso de categoría.
De todos os xeitos, as galegas confían en que o parón lles poida vir ben. As coruñesas chegaron a este tramo da competición con moitas xogadoras con molestias e que non poden render ao 100%. Por ese motivo, neste momento de parón, o cadro técnico vai seguir traballando, pero dando o descanso necesario a varias das xogadoras importantes, e coa confianza en que dentro de tres semanas, o bloque de deportistas do Viaxes Amarelle FSF galego xa poida estar dispoñible ao 100%, e ademais poder reincorporar ás baixas por lesión de futbolistas como: Clàudia Lobo, Carlita e Khrystyna Stepanenko.
Tras este novo duelo oficial da tempada, o conxunto afrontará xornada de descanso este luns, e o martes retomará os adestramentos, intercalando períodos de recuperación, para afrontar o tramo final de competición, que chegará tras o parón de dúas semanas que temos por diante, con motivo da disputa do Europeo de Seleccións Nacionais.
A Primera División do Fútbol Sala Feminino da RFEF afrontará a vixésimo segunda xornada da competición ligueira, en partido que terá lugar o sábado 25 de marzo de 2023, a partir das 18:00 horas no Pavillón Municipal de Sagrada Familia (A Coruña). Nesa cita o conxunto galego do Viaxes Amarelle FSF recibirá ao CD Leganés FSF, outro rival directo pola permanencia. Así que agárdase un partido difícil, loitado e intenso para galegas e madrileñas.
FICHA TÉCNICA
4) AD SALA ZARAGOZA: Ana Eliza, Miriam, Laura Boix, Giba e María Moreno – quinteto inicial -. Tamén xogaron: Carolina Bravo e Illescas.
2) VIAXES AMARELLE FSF: Leti Rojo, Lau Doce, Èlia Gullí, Estelita e María Gómez – quinteto inicial -. Tamén xogaron: Cris Lourés, Tety, Carol Agulla, Marta Hermo e Laura Rivas.
GOLES: 1-0 Laura Boix (min. 8); 2-0 Carolina Bravo (min. 29); 2-1 Carol Agulla (min. 30); 3-1 Laura Boix (min. 34); 3-2 Carol Agulla (min. 36); 4-2 María Moreno (min. 39).
EQUIPO ARBITRAL: Lucía Gómez Rojo e Tomás Santander Flamarique, membros do Comité Técnico de Árbitros de La Rioja e Aragón. Árbitro Asistente: Izán Torner Conejos membro do Comité Técnico de Árbitros de Aragón. Mesa: María Cinta Marín Pastor pertencente ao Comité Técnico de Árbitros de Aragón. Amonestaron a futbolista Ana Eliza do AD Sala Zaragoza con cartón amarelo. Recibiron a mesma sanción as futbolistas do Viaxes Amarelle FSF: Carol Agulla e Lau Doce.
INCIDENCIAS: Partido correspondente á vigésimo primeira xornada da Primera División do fútbol sala femenino da RFEF disputado no Complejo Deportivo Municipal Siglo XXI da cidade de Zaragoza.
