A Selección Galega Sub-16 espertou do soño tras caer na semifinal do Campionato de España de Seleccións Autonómicas (CESA) ante Cataluña (4-2). Foi un partido moi igualado ata o final e moi loitado por As Nosas.
A primeira parte deste choque constituiu unha auténtica montaña rusa. Pin-pan. Un intercambio de golpes foi a nota predominante entre Galicia e Cataluña. As dúas seleccións saíron con todo dispostas a pelexar pola vitoria desde o primeiro segundo de partido.
Así e todo, a primeira selección en golpear foi Cataluña. E non esperou moito. No primeiro minuto de partido grazas ao tanto de Carmen Bello. Pese ao pau, as nosas non viñeron abaixo. Mantiveron o guión e no minuto 7 apareceu Adelaida. Sacou o seu fusil e cun zapatazo empatou a semifinal.
Co empate no electrónico continuaron as alternativas e o intercambio de golpes. Cataluña tivo dúas claras para poñerse de novo por diante, pero os paus da portería galega evitaron o segundo. Tamén Galicia, co 1-1, estrelou unha pelota contra a madeira.
Antes do descanso, as nosas volveron golpear grazas a unha acción de pizarra de David Riveira. Á saída un córner, Paula meteu a biqueira da bota para anotar o 1-2 para Galicia.
Co 1-2 chegouse ao descanso desta semifinal no pavillón da Gándara. Tras o paso polos vestiarios, Galicia tivo o 1-3 nas botas de Paula, pero a gardameta catalá gañoulle a partida no man a man. Co paso dos minutos, o choque volveu romper. A Selección Galega tivo o 2-3 cun disparo de Carlita á madeira nunha acción a balón parado.
Quen si acertou foi Cataluña a falta de cinco minutos para o final cun disparo de Ainara que se acabou coando na meta galega.
Co 3-2, as de David Riveira foron arriba con todo na recta final. Carla Riomao tivo o empate tras un roubo en pista contraria, pero a meta catalá sacou a pelota como puido.
As nosas foron arriba con todo e atacaron con porteira xogadora. Nun erro, Cataluña marcou o 4-2 nas botas de Ona a falta de dous minutos para o final.
FICHA TÉCNICA
4) CATALUÑA: Xènia Casadó, Karen Pons, Carmen Bello, Ona Solans, Mar González, Sònia Cardona, Carla López, Berta Solé, Lara Rodríguez, Paula Villar, Ainara Amador e Ariadna Sobrino.
2) GALICIA: Yanira Guizán (p), Carla Martínez, Aroa Rodríguez, Paula Rodríguez, Sofía Rozas, Alba López, Claudia Rodríguez, Carla Riomao, Irene Suárez, Macarena González, Antía Boullosa e Adelaida González.
GOLES: 1-0, Carmen Bello (min. 1). 1-1, Adelaida (min. 7). 1-2, Paula (min. 18). 2-2, Paula en propia porta (min. 29). 3-2, Ainara (min. 35). 4-2, Ona (min. 38).
EQUIPO ARBITRAL: Marcos Pérez e Rafa Tovar.
INCIDENCIAS: Semifinais do Campionato de España de Seleccións Autonómicas Sub-16 de fútbol sala disputado no pavillón da Gándara en Narón. Diferentes localidades da provincia da Coruña acolleron este CESA de FutSalFem.
