Era difícil, pero como xa o fixeran na primeira volta, había esperanza en que o Autos Cancela Zalaeta se impuxese ao Madrid Chamberí. Non pasou. As galegas regresan da capital do estado cun 3-0 (25-11, 25-23 e 25-19) colleitado no Estadio Vallehermoso.
No partido do Barrio das Flores as xogadoras que adestra Jorge Barrero conseguiran un traballado triunfo por 3-2 ante o Madrid Chamberí. Non foron quen de repetir a xesta nesta segunda volta. Regresan as coruñesas cunha derrota no peto que se suma á da semana pasada en cancha propia.
No primeiro set deste partido da 15ª xornada o Madrid Chamberí non deu chance ás galegas. O tanteo de 25-11 en 22 minutos de xogo. No segundo set as galegas reaccionaron pero non abondou. Tras 25 minutos de xogo as locais levaban o set cun tanteo de 25-23.
O set definitivo, o terceiro, caeu do lado do Madrid Chamberí en 23 minutos por 25-19.
Sofía Bulgarella foi a mellor das locais e do partido. Chegaba ao encontro como máxima anotadora, mellor bloqueadora, e mellor atacante. Rematado o cruce foi a máxima anotadora con 12 puntos, dous deles de saque. Moi lonxe dos sete puntos de Eleonora Guzzi, a máxima anotadora do Autos Cancela Zalaeta, seguida de Alba Quirós con seis.
✖️ FINAL
Madrid Chamberí – 3
Autos Cancela Zalaeta – 0¡VAMOS, MADRID!#hemosvenidoajugar pic.twitter.com/as4p317qaY
— Club Voleibol Madrid (@voleibolmadrid) February 5, 2022
As coruñesas manteñen a sétima praza na táboa clasificatoria da Superliga Feminina 2 (SLF2) de voleibol, con 20 puntos.
A vindeira fin de semana o CV Autos Cancela Zalaeta recibe ao Vóley Sanse Live Vuvuzela no Pavillón Polideportivo do Barrio das Flores da Coruña. Será o sábado 12 ás 17:00 horas. O conxunto visitante ocupa o posto de colista sumando so tres puntos tras 12 partidos xogados.
