O Club Maristas Coruña non puido colleitar un triunfo no seu desprazamento a terras asturianas. O ADBA 87 de Avilés vencía ás galegas por un marcador de 60-49.
Pese a que remontaron no cuarto período, as coruñesas saíron derrotadas do seu desprazamento a Avilés. Con todo, seguen na zona media da táboa clasificatoria a expensas dos partidos que se disputan hoxe domingo 29 de novembro. Vitorias de Cortegada e Ulla Oil Rosalía favorecerían ás herculinas.
Regresar cunha vitoria de Avilés era fundamental na pugna que manteñen os equipos desta LF2 por manter a categoría, pero non puido ser. As asturianas asinaron fronte as coruñesas o seu segundo triunfo da tempada e ademais o primeiro como conxunto local.
Escasa efectividade en ataque das coruñesas
A falta de acerto das de Jorge Carreira en ataque, sumado ao bo partido en defensa do ADBA fixeron que o Maristas no alcanzara os 50 puntos. A máxima anotadora do conxunto coruñés foi Joana Pereira. A portuguesa asinou 17 puntos. Tamén tivo protagonismo diante do aro Andrea Pérez con 13 puntos no seu casilleiro particular.
No primeiro e último cuarto foi onde o ADBA fixo seu o partido. No inicial anotaba un parcial de 20-14 e no último 19-10. No segundo as galegas so quedaron dous puntos por debaixo no parcial, deixando o electrónico no descanso a 31-23. No terceiro remontaron cun parcial de 11-16 que deixa o partido aberto no tanteo global 42-39. Unicamente tres puntos abaixo. Un triple.
Pero no último e definitivo periodo volveron a perder acerto anotador. Asinar so nove puntos levou á derrota ao Club Maristas Coruña que sempre estivo por debaixo do marcador. Con todo, as galegas aínda suman un triunfo máis que as súas rivais desta semana. O equipo que adestra Jorge Carreira é noveno pero toda a parte baixa da clasificación na Liga Feminina 2 está nun pano. A elas, por exemplo, so lles separa un punto das colistas, Magec Tías Contra a Violencia de Xénero.
O ADBA visita Vigo a vindeira semana
Para o ADBA (Agrupación Deportiva Baloncesto Avilés) este partido supuxo o seu segundo triunfo. Son puntos fundamentais na loita pola permanencia na que estarán ambos os dous equipos ao final desta atípica tempada 2020 – 2021 na LF2. Agora mesmo as de Asturias son terceiras pola cola con dez puntos. A vindeira semana o seu rival volve ser galego. Neste caso as viguesas do Celta Zorka Recalvi. O partido está fixado para ás 19:00 horas do sábado 5 de decembro.
Pola súa parte, do Club Maristas Coruña recibe tamén o sábado 5 pero ás 20:30 horas na súa cancha herculina ao Osés Construcción Ardoi.
🏀🏀@adba87 & @MaristasCoruna
Nuestro partido en imagenes.https://t.co/GEM1elVmjz— ADBA (@ADBA87) November 28, 2020
FICHA TÉCNICA
ABDA AGRUPACIÓN DEPORTIVA BALONCESTO AVILES: Artemis Leonor Barbosa (13), Marcy Ariana de Sousa (12), Laura Martínez (1), Sara Fraile (9) e Devon Nicole Brookshire (14) – quinteto inicial -. Tamén xogaron: Marcia Rossana Guimaraes (7), Elisabet López (3) e Carlota Velasco (1).
CLUB MARISTAS CORUÑA: Joana Pereira (17), Laura Martínez (6), Andrea Pérez (13), Laura Cervelo (1) e Mara Cortés (4) – quinteto inicial -. Tamén xogaron: Marina Feijoo (2), Bea Sanz (-), Eugenia Filgueira (6), Lucía Galán (-), Elena Pedrosa (-), Adriadna González (-) e Laura Hughes (-).
PARCIAIS: 20-14, 11-9, 11-16 e 19-10.
ÁRBITROS: Alonso e Velasco. Non houbo xogadoras eliminadas por faltas persoais
INCIDENCIAS: Partido correspondente á novena xornada da LF2 disputado no Complexo Deportivo de Avilés en Asturias.
