O gol chegou para o Dépor ABANCA outra vez nos últimos suspiros do partido, pero esta vez no canto de cara foi cruz. Un tanto en propia porta deu ao traste coas aspiracións das Nosas deportivistas de puntuar na cancha do FC Barcelona B. Caeron derrotadas as pupilas de Irene Ferreras pola mínima cun marcador de 1-0. Carlota Suárez foi a futbolista que tivo a mala pata de anotarlle un gol á súa compañeira Lucía cando intentaba despexar o esférico.
O Dépor ABANCA merecía puntar, pero acabou por perder ante o FC Barcelona B. O conxunto local comezou o partido con forza. Aos 27 segundos, a cancebeira das coruñesas, Lucía, impediu nunha gran intervención que unha volea de Ari Arias coásese na meta herculina. A porteira ponferradina do club branquiazul desviou o coiro a saque de esquina. No minuto 6, Ona Baradad rematou excesivamente cruzado desde a dereita, á dereita da portería coruñesa. O dito, o filial culé empezaba forte o choque coas galegas.
Non baixaron os brazos as coruñesas e o Dépor ABANCA respondeu ás blaugranas o minuto 8 de xogo coa que se cadra foi súa mellor oportunidade en toda a primeira metade. Millene, após gran pase en profundidade de Charle e con todo a favor, rematou ao corpo de Txell Font. Catro minutos despois, un centro de Sara Navarro foi despexado por Berta Doltra cara á súa propia portería, pero a gardameta reaccionou ben para evitar o tanto.
A partir de aí, moito centrocampismo, moita posesión deportivista e escasa resposta por parte das catalás. O partido entraba nunha etapa máis morna.
Logo do paso por vestiarios, na segunda metade, golpeou de novo primeiro o FC Barcelona B, nunha nova chegada de Ona Baradad polo extremo dereito. O seu centro por baixo paseouse por toda a área herculina ata que atopou no segundo pau a Lucía Corrales, cuxa bate coa bota esquerda foise desviada.
A resposta deportivista chegou nun disparo frouxo de Paula Gutiérrez, despois dunha bonita manobra individual, desde 25 metros, que Txell Font atrapou sen problemas. Máis preto do gol estivo Marta Charle ao fío da hora de xogo. O zurdazo cruzado da soriana perdeuse moi preto do pau esquerdo do portal azulgrana.
Locais e visitantes gozaron de ocasións neste segundo acto, e, cando parecía que o marcador xa non se movería, o FC Barcelona B logrou o único tanto do encontro. Foi nun saque de esquina que desviou Carlota Suárez cara á súa propia portería no seu intento de despexe, despistando por completo á porteira das galegas, Lucía, que non puido facer nada por impedir o tanto (1-0).
O Dépor ABANCA continúa segundo
O Dépor ABANCA suma así a súa segunda derrota deste curso en Liga. Con todo, as coruñesas continúan no grupo de cabeza da Primera Federación FutFem con 17 puntos despois de nove xornadas disputadas da competición ligueira. Manteñen a segunda praza como principal perseguedor da SD Eibar, líderes invictas (seis partidos gañados e tres empatados, pero ningunha derrota). O FB Barcelona B empata puntos coas coruñesas na terceira praza pero están por detrás das galegas.
A próxima cita ligueira para o Dépor ABANCA será o vindeiro sábado 26 de novembro ás 11:00 na Cidade Deportiva de Abegondo diante do UD Granadilla Tenerife B.
FICHA TÉCNICA
1) FC BARCELONA B: Txell Font, Esther Laborde, Martina Fernández, Bertra Doltra, Judit Pujols, María Pérez, Júlia Bartel (Laia Martret, min. 59), Ari Mingueza (Noah Bezis, min. 79), Ona Baradad (María Llorella, min. 90+2), Lucía Corrales (Vicky López, min. 59) e Ari Arias (Ari Sánchez, min. 59).
0) RC DEPORTIVO ABANCA: Lucía, Cris Martínez, Inés Altamira, Raquel García, Samara (Patri López, min. 86), Henar, Paula Gutiérrez, Sara Navarro (Ainhoa Marín, min. 62), Eva Dios (Laura Fernández, min. 62), Charle e Millene (Carlota Suárez, min. 75).
GOL: 1-0 Carlota Suárez, en propia meta (min. 87).
EQUIPO ARBITRAL: Lorena del Mar Trujillano Gallardo (c. andaluz). Cartón amarelo a Ari Mingueza (min. 43), Martina Fernández (min. 53), Millene (min. 55) e a adestradora deportivista Irene Ferreras (min. 82).
INCIDENCIAS: Partido correspondente á novena xornada de liga na Primera Federación da RFEF de Fútbol Feminino. O encontro disputouse no campo 7 da Ciutat Esportiva Joan Gamper en Barcelona.