Parafraseando ao futbolista Alfredo Di Stéfano, poderíamos dicir que os derbis, como as finais, non se xogan, gáñanse. Este domingo, 25 de abril, o hoquei sobre patíns galego ten un duelo de rivalidade dos que gusta xogar, vivir e gozar. O HC Deportivo Liceo recibe no pavillón polideportivo de Elviña II ás 18:00 horas ao HC Borbolla. Dous clubs coruñeses fronte a fronte cun mesmo obxectivo: ascender á máxima categoría.
Na grada, 60 espectadores poderán gozar in situ do derbi coruñés da Ok Liga Prata. Un duelo de rivalidade no hoquei a patíns coruñés, é unha experiencia digna de ver. Na cidade herculina esta disciplina de equipo vívese con moita intensidade e a rivalidade, sana, estará patente desde o pitido de inicio.
Ningún dos conxuntos presenta ausencias nas súas filas para este cruce. O partido resulta fundamental para as aspiracións de ambos os dous clubs que non é outra que a de ascender á elite.
“Non temos baixas, nin imos reservar xogadoras no partido do sábado na Ok Liga”, explica Santi Martínez, técnico do HC Borbolla. Consultado sobre se vai dar menos minutos ás patinadoras que xogan no primeiro e no segundo equipo da entidade coruñesa o adestrador desbota esa posibilidade. “Se cadra unha ou dúas teñen algún minuto menos pero por que a estas alturas da tempada, xa levamos oito meses adestrando desde que empezamos a pretempada en agosto, e as pernas empezan a estar cansas”.
Santi Martínez, entrenador do HC Borbolla: “Non temos baixas, nin imos reservar xogadoras no partido do sábado na Ok Liga”
Na escuadra local, o HC Deportivo Liceo tamén afronta o partido sen baixas. “Temos ás dez xogadoras da plantilla disponibles”, explica Carlos Loureiro, adestrador das verdibrancas.
O derbi coruñés de hoquei, en streaming
Para quen non teña a sorte de poder presenciar ao vivo o cruce, Hockey Global transmitirá o encontro en streaming. O espazo dixital adicado ao hoquei a patíns está permitindo a moitos equipos femininos ter visibilidade que demandan xogadoras e seareiras.
Os dous adestradores de hoquei, Carlos Loureiro por parte do HC Deportivo Liceo, e Santi Martínez, pola banda do HC Borbolla, falaron da igualdade que reinará sobre a pista neste cruce, tanto polo nivel dos dous equipos, como por ser un duelo de rivalidade local, un tipo de partido no que calquera pode gañar.
Santi Martínez aseguraba na previa deste derbi de hoque que “os partidos co Liceo son sempre moi intensos e con moita rivalidade, sana, pero rivalidade”.
E pola súa parte, Carlos Loureiro explicaba que encontros como este Liceo vs Borbolla “son deses partidos que se xogásemos un tras outro, en cada ocasión podería gañar un equipo distinto. O que non teño dúbida é que ser á un partido moi bonito para ver”, baticinaba o técnico liceísta.
