Derbi herculino na fase previa da XV Copa Galicia Feminina FS entre o 5 Coruña FSF e o Viaxes Amarelle FSF

O conxunto herculino do Viaxes Amarelle FSF pasará a estrearse en competición oficial esta fin de semana co encontro de fase previa da XV Copa Galicia Feminina FS. A fase previa, que é a partido único, disputarase na tarde do domingo 5 de setembro de 2021, no Pavillón Municipal de Novo Mesoiro (A Coruña) a partir das 19:30 horas, fronte ao conxunto do 5 Coruña FSF.

Este inicio de XV Copa Galicia Feminina FS depara un duelo herculino. Será, xustamente, entre dous equipos, que esta tempada militarán na mesma competición ligueira, o Grupo 1 da Segunda RFEF Futsal Feminina.

Os dous chegan á categoría con diferentes camiños. Mentres o Viaxes Amarelle chega desde a élite logo de descender o pasado curso, tras perder na fase de promoción co Joventut D’ Elx. O 5 Coruña FSF fai o camiño inverso xa que chega á Segund División ascendendo desde a Preferente Galicia Feminina FS.

O equipo dirixido por Jorge Basanta incorporou aos adestramentos, este pasado mércores, á última incorporación do plantel, a xogadora navarra Irune Santesteban, aínda que aínda non formará parte da convocatoria desta fin de semana.

Para este encontro de fase previa que se disputará na tarde de mañá, domingo 5 de setembro, Jorge Basanta citou ás porteiras Sandra Rodríguez e Leti Rojo; así como ás xogadoras de pista, Candela, Patri Romaní, Cris Lourés, Èlia Gullí, Yaiza, Lau Doce, Marta Hermo, María Gómez, Carla Martínez, Ana Bermúdez e Laura Rivas.

O rival que terán en fronte as herculinas é un 5 Coruña FSF que en gran medida, mantén a plantilla coa que conseguiu o ascenso a pasada tempada; e ás que sumou as incorporacións de Alba Canosa e Tami Gándara; aínda que sufriu as baixas de Nerea, Carla e Ana Lago.

O conxunto herculino do 5 Coruña FS segue adestrado por Fany Martínez

O equipo coruñés dirixido por Fany Martínez, vén dunha tempada atípica; onde a liga Preferente Galicia Feminina FS dividiuse en dous grupos, e o cadro herculino quedou líder do grupo Norte con 11 vitorias e 1 empate, tras doce partidos disputados. No partido decisivo, polo ascenso de categoría, impúxose ao Cidade de Pontevedra FSF por un marcador de 2-1.

Para o 5 Coruña FSF será a súa primeira experiencia na competición nacional, cun bloque no que poucas xogadoras competiron na categoría.

O conxunto herculino do Viaxes Amarelle FSF tratará de mostrar a súa mellor versión, aínda sabendo que non ten a todo o equipo nas óptimas condicións aínda; e tratará de poder conseguir o pase á seguinte fase da competición de Copa Galicia Feminina FS.