O público volve á Seca e o fará cun partido emocionante. O Poio Pescamar recibe ao Pescados Rubén Burela nunha nova edición deste derbi galego de futsal. O partido será este sábado, ás 17:00 horas (TVG2).
Este será o reencontro das conserveiras coa súa afección, 14 meses despois. No bando rival, o partido suporá a volta das Guerreiras Laranxas á competición ligueira tras conquistar a súa terceira Copa da Raíña consecutiva.
Segundo Luísa Mayara, 12 do club mariñán, “este novo título aumenta a responsabilidade do Pescados Rubén Burela de querer seguir medrando. Imos con todo o respecto a Poio, pero temos que demostrar por que somos as mellores”.
Luísa Mayara (Burela): “Imos con todo o respecto a Poio, pero temos que demostrar por que somos as mellores”
O club local tivo unha xornada de descanso, ao paralizarse a competición a fin de semana pasada para a celebración da Copa da Raíña. Así, as de Manu Cossío tiveron máis tempo para adestrar e preparar o derbi galego, ao que chegan máis descansadas.
Pola contra, as laranxas foron máis xustas de tempo. “Tivemos un pouco de tempo para todo. Volvemos aos adestramentos o mércores; tivemos tempo para celebrar, que foi moi merecido, pero tamén para descansar un pouco despois da esixencia da Copa”, apuntaba Mayara.
Neste novo partido, o Burela defenderá a súa segunda posición no grupo polo título de campión, mentres que o Poio sitúase como cuarto, tamén dentro da loita por declararse vencedor.
O Burela venceu ao Poio nas tres últimas ocasións
Atendendo aos últimos encontros entre as protagonistas deste derbi galego, a balanza inclinouse en máis ocasións a favor das laranxas. O Burela venceu ao Poio na final da Copa da Raíña de Málaga, na correspondente á tempada 2019/2020, cun 1-0.
Repetiu vitoria na Supercopa, declarándose campión cun 2-0, e tamén venceu na primeira volta ligueira desta segunda fase, cun resultado 4-1.
Luísa Mayara (Burela): “Será un partido equilibrado”
A xogadora brasileira do equipo da Mariña prevé “un partido equilibrado, como foi o primeiro tempo aquí en Liga. Poio necesita gañar en defensa desa cuarta praza e nós imos coa intención de manter a nosa liña, sen conceder nada”.
Sen dúbida, a afección do Poio Pescamar poderá desfrutar nas bancadas da Seca dun duelo do máis alto nivel do futsal galego.
