Xornada destacada para o baloncesto galego na LF Endesa. BAXI Ferrol e Durán Maquinaria Ensino medirán forzas no derbi irmandiño na LF Endesa, ambos necesitados de vencer para escalar postos na táboa clasificatoria.
O duelo terá lugaro este sábado, 11 de decembro, ás 16:00 horas, coas ferrolás como anfitrioas na Malata. Actualmente, as locais están en peor posición, ocupando o 14º posto, con 14 puntos obtidos en tres vitorias e oito derrotas. Pola súa banda, o Ensino está a dúas posicións, no 12º posto, cun punto máis que o BAXI.
Man a man na elite do baloncesto galego
No apartado estatístico, ambos equipos seguen liñas case paralelas na competición. Despois de once xornadas, o BAXI Ferrol acumula unha valoración media de 58 créditos, mentres que as lucenses acadan un 52,6.
Nos tiros, o Ensino é superior desde a liña exterior, cun acerto do 32,9% fronte ao 28,7% ferrolán, aínda que estas últimas son mellores no tiro libre, cun 72,3% polo 68,2% lucense. Entre as puntuacións medias, o equipo de Ortega sitúase nunha media de 60,3 puntos, mentres que as de López están nos 61.
A nivel individual, a xogadora mellor valorada de ambos clubs é Taylor Koenen, do club universitario, que conta cunha media de 12,1 créditos por partido. Porén, nas anotacións é Helena Oma, das lucenses, a mellor posicionada no ránking, con 13,67 puntos de media por encontro, moi preto da propia Koenen, que ten unha media de 13.
Respecto á derradeira xornada disputada, o Ensino saiu vencedor do seu encontro ante o Casademont Zaragoza, mentres que o BAXI Ferrol non puido facerlle fronte ao Valencia Basket.
Lino López: “É unha boa ocasión para desfrutar dun derbi galego nunha das mellores ligas de Europa”
