A 20ª xornada da Primeira División do Voleibol chega con encontros moi importantes para as galegas. O prato forte será o derbi CV Bruxas – Aceites Abril CVO, do sábado, ás 19:30 horas. Pero o Bruxas xoga tamén o domingo, ás 12:30 horas, recuperando o partido ante a Universidad de Salamanca. Pola súa parte, o Calasancias Coruña disputará un duelo contra o Universidad de Valladolid o sábado, ás 16:30 horas.
Coa tempada a tres partidos de finalizar, e con algúns por recuperar, os equipos galegos teñen intereses distintos. As ourensás do Aceites Abril loitan por ascender, mentres que o Bruxas e o Calasancias ocupan a parte media-baixa, polo de agora alonxadas do descenso.
O derbi das galegas
No encontro que se celebrará en Bertamiráns, as amienses queren seguir sumando puntos nunha boa tempada, ante un conxunto ourensán que quere manter a súa segunda posición.
As visitantes, o Aceites Abril, chegan dunha excelente vitoria ante Los Campos na xornada anterior, onde asinaron un pleno de sets demostrando o seu poderío. Pola súa parte, as locais, caeron ante o líder, as asturianas do CV Oviedo, que gañaron o partido por un 3-0.
Os dous equipos son vellos coñecidos, o que aumenta a competitividade entre ambos. Ademais, este duelo será fundamental para a recta final da liga, na que as ourensás queren manterse na posición de prata para disputar a Fase de Ascenso, e as de Bertamiráns queren seguir escalando postos.
O partido celebrarase a porta pechada, pero poderá seguirse en directo vía streaming polas redes sociais de @voleyourense.
O outro partido do Bruxas
Ao día seguinte, o Bruxas non descansa e viaxa a Salamanca para competir contra o oitavo clasificado. Neste partido a igualdade reinará sobre a pista, xa que os dous conxuntos son próximos na táboa.
Só están separados polo Calasancias, xa que o Universidad de Salamanca suma 13 puntos e o Bruxas 22. Porén, con dous partidos máis xogados por parte das locais, as cifras son favorables ás galegas, que acumulan catro vitorias máis de tres puntos.
O Calasancias tamén xoga
Antes da xornada do domingo, as coruñesas do Calasancias compiten en Valladolid. Este será un duelo complicado para las herculinas, que visitan ás cuartas clasificadas.
O Universidad de Valladolid suma máis do dobre de puntos que as galegas, con 29 fronte os 14 das visitantes, e teñen case tantos puntos a favor (1244), como as coruñesas en contra (1206).
Porén, sendo o equipo galego en peor posición, o Calasancias precisa unha vitoria para afianzar a permanencia.
