A Liga Feminina 2 trae un novo derbi das Rías Altas, no cal o Maristas Coruña recibe ao BAXI Ferrol. O partido, que se celebrará en A Coruña, será este sábado 13, ás 19:00 horas.
Nel, as locais intentarán afianzar dunha vez a permanencia na segunda mellor categoría do baloncesto español. Coa súa posición, undécimas, as herculinas teñen pé e medio na LF2, pero a zona baixa está moi axustada. Empatadas co Arxil e a AD Cortegada, as coruñesas suman dúas vitorias máis que os tres últimos clasificados.
Porén, seguir sumando ata que remate a tempada é primordial para non levar un susto neste tramo final. O Rosalía é o actual candidato ao descenso, pero quedando tres partidos en xogo, calquera cousa pode pasar.
Ademais, esta xornada en casa preséntase complicada. As tamén galegas do BAXI Ferrol son o mellor conxunto deste grupo, xa que en todo o curso non perderon ningún encontro.
Buscando o pleno de vitorias, as ferrolás desprázanse á Coruña en busca do 24º trunfo. Para iso, as xogadoras da cidade departamental viaxan sen baixas e en plena forma para competir.
Lino López analiza ao Maristas
O adestrador visitante, Lino López, non subestima ás rivais do BAXI. “É un equipo recentemente ascendido que fai un xogo que me gusta e creo que está ben traballado. Casi está salvado e lle gusta xogar ataques moi rápidos”, analiza.
Lino López: “(O Maristas) casi está salvado e lle gusta xogar ataques moi rápidos”
Por iso, a meta ante o Maristas é seguir mellorando os erros cometidos en xornadas anteriores, e “seguir dando pasos á fronte”. O BAXI ten xa a mirada posta na segunda fase da competición, á que quere chegar na mellor forma posible.
Porén, o adestrador recorda que aínda quedan tres duelos por diante, pero “desde o corpo técnico xa estamos traballando e vendo moitos partidos, facendo cortes de xogadas doutros equipos que tamén están clasificados para a fase”.
Antes diso, hai que rematar este primeira parte, e con ela este derbi galego no que os dous puntos da vitoria son igualmente importantes para ambos.
Como é costume, o partido seguirase vía streaming desde o Canal FEB.
